Deputeti i Partisë Demokratike, Agron Gjekmarkaj ka publikuar një artikull nga një takim që ka pasur me një ish-ministër nga kampi tjetër politik. Gjekmarkaj ka publikuar një foto nga takimi që ka zhvilluar me ish-ministrin e Jashtëm, Ditmir Bushati teksa shkruan se e ka takuar në qilarin e një lokali në Babrru.
Nisur nga fakti që Bushati nuk është më pjesë e parlamentit, Gjekmarkaj shkruan me humor se pa pyetur për shëndetin, pyeti për “shokët” në parlament. Ai ironizon ish-ministrin Damian Gjiknuri, duke thënë se me hallet që ka mbi supe, ka rënë nga pesha. Të njëjtën gjë thotë edhe për zv. kryeministrin Arben Ahmetaj kur shkruan se “si i dobësuar ngjan mos kursen si gjirokastrit e ha pak”.
Në artikull ai nuk lë pa përmendur as ish- zv.kryeministrin Erion Braçe, ku thotë se ai dhe Ahmetaj janë të detyruar të shkojnë mirë bashkë se kështu e “kërkon partia”. Për ministrin e Mbrotjes, Niko Peleshi, ai thotë se e takon fshehurazi, ndonëse kryeministri Rama i thotë në media të sillen si njerëz me dinjitet.
Gjekmarkaj shkruan se Bushati kujtoi gjithashtu kohën kur ishte një ndër njerëzit më besnik të Ramës, duke e krahasuar veten me Grida Dumën, Gazment Bardhin e Evrin Salianjin, dhe thotë se Basha mund t’i largojë papritur siç bëri kryeministri Rama me të.
Së fundmi, Gjekmarkaj shkruan se diskutuan dhe për bashkëqeverisjen, ku shkruan me humor se pas takimit, Bushati u nis drejt e në Surrel.
