Ka zgjatur rreth 6 orë marrja në pyetje nga Prokurorët e SPAK të Agron Nezës, personit që në dosjen e ish-agjentit të FBI-së, Charles McGonigal, identifikohet si personi “B”.
Neza ka shmangur komentet lidhur me marrjen në pyetje, ndërsa i ka këshilluar gazetarët që të pyesin Prokurorin e SPAK lidhur me praninë e tij në Prokurorinë Speciale.
SPAK ka nisur hetimet lidhur me dosjen McGonigal, pjesën e Shqipërisë, atje ku përmendet edhe edhe i Kryeministrit Edi Rama. Më herët SPAK ka marrë në pyetje edhe Dorian Duçkën, ish-këshilltar i jashtëm i Kryeministrit.
Sipas dosjes, në gusht 2017 McGonigal është takuar me Agron Nezën, një ish-agjent shqiptar, i njohur si personi ‘B’, i vendosur prej vitesh në SHBA dhe me pasaportë amerikane.
McGonigal i ka kërkuar para Nezës dhe më pas të bëjnë udhëtime nëpër Europë ku McGonigal me sa duket përdori pozicionin e tij në përpjekjet për të krijuar biznes për zotin Neza, sugjeruan prokurorët në padinë e Uashingtonit.
Rreth një vit më parë Gazment Bardhi, kreu i Grupit Parlamentar të PD, depozitoi në SPAK një kallëzim penal lidhur me atë që njihet si dosja “McGonigal”.
Pak ditë më parë, Bardhi me cilësinë e personit që ka bërë kallëzimin kërkoi nga SPAK informacio0ne lidhur me hetimin.
Kërkesa drejtuar SPAK nga Bardhi përmban një kallëzim penal ndaj Edi Ramës lidhur me aferën McGonigal, duke paraqitur të dhëna për kryerjen e 4 veprave penale:
1. Korrupsion aktiv i nëpunësve të huaj publikë;
2. Deklarimi i rremë i pasurive, interesave privatë të personave të zgjedhur dhe nëpunësve publikë;
3. Pastrim i produkteve të veprës penale ose veprimtarisë kriminale;
4. Grup i strukturuar kriminal dhe kryerja e veprës penale nga grupi i strukturuar kriminal.
E ndërsa nuk dihet nëse SPAK ka nisur ndonjë hetim ndaj Kryeministrit Edi Rama pas kallëzimit të SPAK apo nëse Prokuroria Speciale ka kërkuar informacione nga SHBA lidhur me çështjen McGonigal, deputeti demokrat iu drejtua me një kërkesë zyrtare drejtuesit të Prokurorisë Speciale, Altin Dumani, për ti kërkuar informacione mbi hetimet.
Kërkesa erdhi pas pranimit të fajësisë nga Charles F. McGonigal.
“Pranimi i fajësisë nga shtetasi amerikan Charles F. McGonigal e lidhin këtë të fundit me veprime dhe mosveprime të kundërligjshme të shtetasit Edi Rama, me detyrë kryeministër i Shqipërisë. Përvec pagesës në të zezë për të nisur një hetim të rremë kundër kundërshtarëve politik të Kryeministrit, çka përbën qartësisht korrupsion aktiv të zyrtarëve të huaj, rezulton se gjatë dëshmisë për pranimin e fajësisë Charles F. McGonigal ka shpjeguar se marrëdhënien me Edi Ramën e krijoi për efekt të biznesit”, shkruan Bardhi në kërkesën drejtuar SPAK.
Gjithashtu ai kërkon informacion nga SPAK, të cilit i kërkon të ruaj sekretin hetimor, por sigurisht të sqarojë fazën në të cilën ndodhet hetimi.
“Në vijim të procedurave ligjore të ndjekura në Shtetet e Bashkuara të Amerikës në lidhje me këtë çështje, ndodhur përpara dyshimeve të arsyeshme për kryerjen nga shtetasi Edi Rama të veprave penale të kallëzuara nga ana jonë, në zbatim të nenit 110 të K.Pr.Penale, kërkojmë që të vihemi në dijeni në lidhje me ecurinë e hetimit të kësaj çështjeje pranë Prokurorisë që ju drejtoni, duke ruajtur dhe pa cenuar sekretin hetimor”, thuhet në letër.
Discussion about this post