Kryetarja e Kuvendit, Lindita Nikolla, ka njoftuar mbledhjen e Këshillit të Mandateve dhe Imuniteteve pasditen e së martës. Mbledhja do të zhvillohet me dyer të mbyllura, ndërsa SPAK do të paraqesë provat dhe faktet që zotëron, për të bindur Këshillin për të miratuar autorizimin për arrestimin e ish-zv.Kryeministrit dhe deputetit Arben Ahmetaj.
Përpara se Nikolla të njoftonte mbi datën dhe orën e mbledhjes së Këshillit , deputeti gazment Bardhi kishte kërkuar që ajo të zhvillohej pasditen e sotme.
Ndërkohë ish-zv.Kryeministri Arben Ahmetaj, përmes avokatëve të tij, ka kërkuar më shumë kohë në dispozicion. Duket se kërkesa e SPAK ka kapur në befasi Ahmetajn, por edhe avokatët.
Avokati Henrik Ligori, në një prononcim për Gazeta Express, tha se ende nuk është vendosur nëse Ahmetaj do të jetë i pranishëm në mbledhjen e Këshillit për Rregulloren, Mandatet dhe Imunitetin, ku do të shqyrtohet kërkesa e SPAK.
Ai theksoi se kanë bërë një kërkesë që mbledhja të shqyhet me qëllim që të kenë më shumë kohë për t’u mbrojtur.
“Nuk e kemi vendosur akoma nëse do të marrë pjesë zoti Ahmetaj, do ta mendojmë, sepse ka shumë mundësi që nesër të shtyhet mbledhja sepse po kërkojmë më shumë kohë që të mbrohemi”, tha ai.
Në urdhrin e kryeparlamentares Lindita Nikolla thuhet: “Urdhëroj thirrjen e Këshillit për Rregulloren, Mandatet dhe Imunitetin, datë 11.07.2023, ora 16:00 në Kryesinë e Kuvendit”.
Rendi i ditës do të jetë “shqyrtimi i kërkesës së Prokurorisë së Posaçme Kundër Korrupsionit dhe Krimit të Organizuar, për dhënien e autorizimi nga Kuvendi për arrestim/heqje e lirisë dhe ushtrimin e kontrollit personal/të banesës së deputetit të Kuvendit të Shqipërisë, Arben Ahmetaj”.
Discussion about this post