Ahmetaj “letër e djegur” për PS, kush do e zëvendësojë në Kuvend/ Grupin pritet ta drejtojë…

SPAK kërkoi leje nga Kuvendi për arrestimin e Arben Ahmetajt, ish-zv.Kryeministër dhe deputet i PS-së, ndërsa pasditen e së martës pritet mbledhja e Këshillit për Mandatet dhe Rregulloren që do të marrë në shqyrtim kërkesën e Prokurorisë Speciale.

Paralelisht me kërkesën e SPAK, Grupi i PS ka marrë një vendim për t’a miratuar atë, sipas asaj që më parë ka deklaruar edhe Kryeministri Edi Rama se socialistët nuk do të bëhen mburojë për askënd.

E ndërsa nuk ka një vendim përfundimtar nga Kuvendi mbi atë se çfarë do të ndodhë me Arben Ahmetajn, në Partinë Socialiste duket se ish-zv.Kryeministri konsiderohet një histori e mbyllur, ndërsa pritet zëvendësimi i tij nga lista shumëemërore e kandidatëve për deputet në Qarkun e Tiranës.

Nëse Kuvendi miraton, ashtu sikundër pritet, heqjen e mandatit për deputetin, emri që pritet ta zëvendësojë në Parlament është Plarent Ndreca, aktualisht anëtar i Këshillit Bashkiak të Tiranës. E nëse Ndreca nuk pranon, atëherë si emra pasardhës në listë janë Dallëndyshe Bici, drejtuesja e Kadastrës dhe Ylli Shehu, ish-deputet, fillimisht nga rradhët e LSI dhe më pas iu bashkua Partisë Socialiste.

Por gjithashtu në rradhët e PS-së po diskutohet edhe për zëvendësimin e Taulant Ballës në funksionin e kreut të Grupit Parlamentar. Pasi Balla mori detyrën e ministrit të Brendshëm, tashmë i dekretuar edhe nga Presidenti, pritet që ai të dorëzojë atë të Kryetarit të Grupit.

Deri më tani si kandidatë të mundshëm janë Toni Gogu dhe Ermonela Felaj, por nuk përjashtohet mundësia që Edi Rama t’ia besojë këtë funksion Damian Gjiknurit, Sekretarit të Përgjithshëm të PS-së.

Gjiknuri është pjesë e një takimi që po zhvillohet në vilës 30 mes Kryeministrit Edi Rama, Taulant Ballës, Ulsi Manjës dhe Engjëll Agaçit, nga ku pritet të dalë edhe një vendim mbi atë se cila do të jetë lëvizja e rradhës së mazhorancës në Kuvend.

Mes 3 kandidatëve që përfliten për të drejtuar Grupin Parlamnentar, Gjiknuri ka një eksperiencë më të gjatë parlamentare, përfshi edhe atë të negociatave, pasi prej të paktën 10 vitesh, ai ka qenë pjesë e formateve të negociimeve pozitë-opozitë, qoftë për ndryshimet Kushtetuese ashtu edhe për Reformën Zgjedhore.