“Ahmetaj, viktima e Ramës për të larguar fokusin nga McGonigal”

Deputeti i Partisë Demokratike, Luçiano Boçi tha se Arben Ahmetaj është “viktima” që i duhet Ramës për të hequr vëmendjen nga afera McGonigal.

Sipas tij, kryeministri do të përgjigjet për gjithçka edhe përballë Shteteve të Bashkuara të Amerikës, por fillimisht ata do të gjejnë fajin e korrupsionit te McGonigal dhe më pas do të kalojnë te Rama.

Boçi u shpreh se qeveria aktuale po paguan më shumë për të përgjuar shtetasit, sesa për të mbrojtur të dhënat e tyre dhe në këto kushte, përgjigjja për këtë gjë do të jepet më 14 maj.

“Rama do të përgjigjet për presionin që ai po bën për të kaluar ligjin për amnistinë fiskale. Ky hap do të legalizojë vlera të rëndësishme parash të pista, që miqtë e Ramës kanë sjellë ndërkohë në Shqipëri. Në mbështetje të këtyre flukseve financiare, bashkia e Tiranës vazhdon të mbjellë kulla pa kuptim rreth e rrotull një qendre, tashmë të zaptuar me rrokaqiej betoni,” u shpreh ai përmes një reagimi në rrjetet sociale.