Shqipëria ka sot një fabrikë të re të prodhimit të konfeksioneve që ka kaluar në cikël të mbyllur prodhimi. Sipas Ministrit të Financave dhe Ekonomisë, Arben Ahmetaj, në këtë mënyrë të mirat materiale vijnë jo vetëm për kompanianë por edhe për vendin.
Kalimi ne cikël të mbyllur prodhimi. Ishte ky synimi kryesor i paketës për mbështetjen e këtij sektori që u hartua nga Ministria e Ekonomisë në vitin 2014 e që shihet sot i zbatuar në këtë fabrikë të re të prodhimit të konfeksioneve.
Përjashtimi nga TVSH i makinerive dhe pajisjeve dhe rimbursimi i TVSH, ishin dy nxitjet kryesore dhe mbështetje për të ndërmarrë këtë investim tha pronari i fabrikës.
Ndersa për Ministrin Ahmetaj gjithë logjika e paketës së fasonëve ishte mbështetja e këtij segmenti të industrisë së tekstileve, për të kaluar në cikël të plotë, që e gjithë vlera e shtuar krijohet dhe mbetet këtu dhe produkti i gjithë eksportohet, duke sjellë të mira materiale, monetare për kompaninë, por sigurisht edhe për vendin.
“- Sot unë shoh të punësuar rishtazi nga zona, ku përveçse janë trajnuar, sot kanë mundësi të ndihmojnë edhe ata që do të vijnë gjatë vitit 2018, gati 400 punëtorë, dhe më besoni që këtu ka familje që përfitojnë muaj pas muaji, vit pas viti nga zhvillimi i kësaj sipërmarrjeje.
Jam gjithashtu shumë i kënaqur se kompania ka përfituar nga politikat, qoftë fiskale, qoftë te punësimit që ne kemi avancuar”.
Përmes një investimi rreth 2 milionë euro për ndërtimin e ambienteve të reja dhe blerjen e linjës së plotë të makinerive, ndërmarrja që dikur operonte në regjimin e përpunimit aktiv (fason), tashmë ka krijuar biznesin e ri me cikël të mbyllur prodhimi, duke materializuar produktin final dhe njëkohësisht duke ofruar një mundësi të re punësimi për rreth 400 punonjës në zonën e Vorës.
