Deputeti i Partisë Demokratike, Agron Gjekmarkaj ka ironizuar deklaratën e Ministres së Bujqësisë e cila njoftoi ngritjen e akademisë për barinjtë. Përmes një postimi në rrjetin social Facebook, ai shkruan mes ironie se, që nga kohët e hershme deri më sot, barinjtë dhe bujqit ja kanë futur kot dhe nuk kanë ditur se si rriten bagëtitë.
Ai vazhdon e më tej duke thënë se, qeveria do të shpenzojë për të rritur komunikimin me dhitë dhe delet. “Ta gëzoni Akademinë e re për barinjtë! Zonja Frida Krifca ministrja e bujqësisë sot dha një sihariq të madh për Shqipërinë dhe Botën! Ajo dha lajmin se do hapë një Akademi për Barinjtë, nëpërmjet saj do nxisë të rinjtë të duan kafshët dhe profesionin. Që nga koha e Evës e Adamit qëkur njerëzia ruan dele, dhi e lopë s’paskëshin ditur ç’bënin! Ja paskan mbushur kot! Leshi , qumështi , tlyeni, gjiza, kosi i marrë deri sot s’ka qenë cilësor! Barinjët pa diploma janë sorollatur kot maleve e gërxheve. Atyre u ka munguar akademizmi! Po dhitë si e kanë pranuar këtë padituri? Po deshërit pse nuk u tërbuan?? Tani gjithçka do të ndryshojë Barinjtë do kuptojnë nga leksionet hallet e deleve , ndërsa ato do blegërijnë më ëmbël pas mësimit”, shkruan ai.
Duke vazhduar me ironi dhe nota tallëse, Gjekmarkaj shprehet se është e qartë që qeveria po krijon një tjetër mundësi ku mund të abuzojnë rehat ministrat e preferuar. “Ministresha ka të drejtë vetë do japë leksione! Tani lopëve do ju flasë edhe vetë Edi Rama , barinjve si t’i mjelin Krifca vetë! Këtë Akademi meqenëse Gjinushi është i zënë do e udhëheqë Rama vetë! Zëvendës akademik Damua dhe lektor i parë Ahmetaj”, shkruan ai.
Ndërsa edhe deputet në komisionin ku Krifca dha këtë lajm kanë dalë kundër duke thënë se është qesharake dhe pa vlerë për t’i vënë fonde në dispozicion.
Discussion about this post