Pavarësisht reshjeve të dendura të shiut dhe dëborës gjatë natës, Autoriteti Rrugor Shqiptar njofton se nuk ka probleme në asnjë aks rrugor për qarkullimin e mjeteve.
Sipas njoftimit, kontraktorët kanë punuar gjatë natës për pastrimin e rrugës nga dëbora, shpërndarjen e kripës dhe materialeve inerte në ato segmente ku kanë vijuar reshjet e shiut.
Akset rrugore nacionale janë të hapura dhe qarkullimi kryhet pa probleme. Nisur nga situata e reshjeve, ARRSH i bën thirrje drejtuesve të mjeteve të respektojnë sinjalistikën rrugore, të reduktojnë shpejtësinë dhe të pajisen me zinxhirë dhe goma dimërore.
Vendi ynë prej disa ditësh ka qenë në pushtetin e reshjeve të shiut, ndërsa vetëm ditën e djeshme nisën reshjet e para të dëborës në zonat malore, duke sjellë zyrtarisht të ftohtin e acartë në vend.
Discussion about this post