Po, në Shqipëri ndodh edhe kjo: ndërsa në spitale mungon qetësuesi për kancerin dhe fëmijët në Pediatri shtrohen për t’u lutur, jo për t’u kuruar, shteti firmos 2 MILIONË EURO për “mirëmbajtje sistemi”. Dhe jo për një sistem që shpëton jetë – por për një kompjuter të AKSHI-t.
Po të kesh hallin e një kodi, e gjen shtetin me thes me euro në dorë. Po të kesh hallin e jetës, të thonë “s’kemi fonde”. Ky është realiteti.
Kontrata? Pa garë. Pa konkurencë. Pa shpjegim. Me negociata të mbyllura, si pazari i natës. E fitoi ONI SHPK, një kompani që e ka pasur dorën ngrohtë nga shteti edhe më parë. Nuk është çudi: në Shqipëri, qarkullojnë më shumë tendera të fshehtë sesa recetat e mjekut.
Ndërkohë, në QSU “Nënë Tereza”, ku gjoja funksionon ky sistem i artë, pacientët kërkojnë rrugës për barna që s’ka. Sistemi që mirëmbahet me miliona nuk ndihmon askënd – veç ndoshta disa llogari bankare të fshehura.
Ky nuk është më skandal – është banditizëm i bardhë, me kostum e me vulë. Të mbash një popull në varfëri, të lësh pacientët të vuajnë, ndërsa firmos miliona për letra pa garë? Kjo është arrogancë që meriton vetëm një fjalë: turp.
Dhe nëse mendon se ky është rasti i vetëm, gabohesh. Shqipëria është bërë “republika e tenderave të errët”, ku mjekësia vdes dhe mirëmbajtja fiton miliona.
Ndërkohë, ministrat postojnë foto nga konferencat e teknologjisë, ku flasin për digjitalizim, ndërsa pacientët digjen në korridoret e shëndetësisë që nuk funksionon.
Mos e harroni këtë shifër: 2 milionë euro. Jo për ilace. Jo për shërbim. Por për… mirëmbajtje.
Gijotina.com
Discussion about this post