Një aksident i rëndë ka ndodhur pasditen e sotme në aksin nacional Berat-Dimal, në vendin e quajtur Moravë, ku si pasojë kanë mbetur të plagosur një familje e tërë.
Një mjet furgon mallrash, tip “Benz”, i drejtuar nga shtetasi 31 vjeçar Valter Belishanku, ka devijuar në përpjekje për të parakaluar dhe është përplasur me një automjet tip “Hunday”, i drejtuar nga shtetasi Resmi Bilbili, ku udhëtonte një familje e tërë.
Aksidenti ka qenë me pasoja më të rënda për familjen Bilbili, ku si pasojë kanë mbetur të plagosur 4 persona: kryefamiljari Resmi Bilbili, bashkëshortja e tij Gjinofeva dhe dy fëmijët e çiftit, djali me emrin Riza dhe vajza Pamela.
Drejtuesi furgonit, 30-vjeçari Valter Belishaku, është shoqëruar në polici, ku po jep edhe deklarimet në lidhje me aksidentin e rëndë.
4 pjesëtarët e familjes Bilbili, të gjithë të plagosur rëndë, janë transportuar me urgjencë drejt Spitalit Rajonal Berat. Burimet spitalore bëjnë me dije se, pjesëtaret e familjes Bilbili janë në terapi intesive në Repartin e Reanimacionit në Spitalin Rajonal Berat.
Në vendngjarje kanë mbërritur forca të shumta të policisë rrugore dhe ekspertë, që po kryejnë këqyrjen e vendit të ngjarjes, për të zbuluar dinamikën e aksidentit të rëndë.
Burimet e para policore nga vendngjarja pohojnë se shkak për aksidentin e rëndë ka qenë lagështia në rrugë, shpejtësia e drejtuesit të furgonit dhe parakalimi i tij i gabuar.
