Aksident i rëndë në Gjermani, Ministria e Jashtme: Tre shqiptarë kanë humbur jetën, 4 të plagosur

Ministria e Jashtme, përmes një postimi në rrjetet sociale, njofton se në një aksident të rëndë rrugor, të regjistruar këtë të dielë në Gjermani, kanë humbur jetën tre shtetas shqiptarë.

Sipas njoftimit të MEPJ, si pasojë e aksidentit katër shqiptarë kanë mbetur po ashtu të plagosur dhe po trajtohen me ndihmë mjekësore.

“Ministria për Evropën dhe Punët e Jashtme është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz, ku janë përfshirë disa shtetas shqiptarë. Me keqardhje njoftojmë se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale”, thuhet në njoftim.

Sakaq, sqarohet më tej se Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet.

Hetimet për rrethanat e aksidentit janë ende në vijim, ndërsa Ministria për Evropën dhe Punët e Jashtme shpreh ngushëllimet për familjet e viktimave dhe uron shërim të plotë për të plagosurit.

Aksidenti

Sipas mediave gjermane, aksidenti me minibus ndodhi në autostradën A48 pranë qytetit Koblenz, në landin gjerman Rheinland-Pfalz. Sipas policisë, përvec viktimave, gjashtë persona të tjerë u plagosën, disa prej tyre rëndë.

Minibusi raportohet se po kthehej nga një festë familjare në orët e para të mëngjesit kur për arsye ende të paqarta doli nga rruga dhe u përmbys.

Sipas hetimeve paraprake, udhëtarët kishin qenë më herët në një festë familjare në landin Hesse. Policia sqaroi se deri në mesditën e së dielës nuk kishte asnjë tregues se drejtuesi i mjetit, një 22-vjeçar, të kishte qenë nën efektin e alkoolit apo drogës.

“Është një aksident vërtet shumë, shumë i rëndë,” deklaroi një zëdhënës i policisë të dielën në mëngjes në Koblenz. Aksidenti ndodhi rreth orës 3:05 të mëngjesit, në drejtim të Trier-it, në zonën e Bassenheim (rrethi Mayen-Koblenz).

Tre viktimat, sipas mediave, janë një burrë 53-vjeçar dhe dy gra, përkatësisht 47 dhe 65 vjeç. Të gjashtë personat e tjerë të përfshirë në aksident janë në moshë nga 20 deri në 66 vjeç. Fatmirësisht, ata nuk kanë pësuar lëndime që rrezikojnë jetën. Mjeti i përfshirë ishte një minibus me nëntë vende.