Një minator ka humbur jetën dhe një tjetër është plagosur këtë të martë, gjatë punës në subjektin minerar ‘Ylberi sh.p.k”. në Martanesh të Bulqizës.
Viktima është identifikuar si Armand Peshku, 29 vjeç, ndërsa i plagosuri Hajdar Bala, të dy me detyrë vagonist. Ky i fundit është dërguar për mjekim të specializuar drejt spitalit të Traumës në Tiranë, për shkak të gjendjes së rënduar shëndetësore.
“Rreth orës 12.50, dyshohet se janë aksidentuar gjatë punës në një subjekt minerar në Thekën, Martanesh, shtetasi A.P. dhe H.B., të dy me detyrë vagonist në minierë. Si pasojë e plagëve të marra shtetasi A.P. ka humbur jetën, ndërsa shtetasi H.B. është transportuar në spital për ndihmë mjekësore”, thuhet në një paraprak të policisë lokale për rastin, që shton se janë “po shoqëron personat përgjegjës për veprime të mëtejshme” dhe “po punon për zgjedhjen e ngjarjes”.
Burime policore bëjnë me dije se dyshohet që mbi minatorët ka rënë një masiv gurësh.
Numri i aksidenteve të rëndë në punë në vendin tonë mbetet i lartë. Mesatarisht çdo vit 32 persona humbin jetën në aksidente të kësaj natyre sipas raporteve të viteve të fundit të Inspektoratit të Punës, kryesisht në ndërtim dhe miniera.
Discussion about this post