Një aksident rrugor është shënuar mbrëmjen e sotme në qytetin e Lushnjes, ku një shpërndarës picash ka mbetur i lënduar dhe është dërguar në spital. Aksidenti ka ndodhur në ‘bulevardin e palmave’.
Sipas informacioneve paraprake, motoçikleta me targa AV 450, e drejtuar nga një i ri rreth 30 vjeç, është përplasur me një automjet tip ‘Ford’ me targa AA 599 VH, i cili po dilte nga një parking. Për shkak të shikimit të kufizuar dhe daljes në mënyrë të pakujdesshme në rrugë, drejtuesi i mjetit nuk ka vënë re motoçiklistin, duke shkaktuar përplasjen.
Si pasojë, drejtuesi i motoçikletës ka marrë dëmtime dhe është transportuar menjëherë në spitalin e Lushnjes, ku ndodhet nën kujdesin e mjekëve. Fatmirësisht, ai ndodhet jashtë rrezikut për jetën.
Policia ka mbërritur menjëherë në vendngjarje, ka rregulluar trafikun në zonën e ngarkuar dhe po vijon punën për dokumentimin e aksidentit. Drejtuesi i mjetit Ford është shoqëruar në komisariat për të sqaruar rrethanat e ngjarjes.
Discussion about this post