Aksident në tunelin e Krrabës, makina shpërthen në flakë

Momente paniku janë regjistruar këtë të premten në tunelin e Krrabës, ku dy makina u përfshinë në një aksident.

Sipas të dhënave paraprake, një makinë tip Benz ka goditur nga pas një kamion dhe më pas ka shpërthyer në flakë.

Fatmirësisht, si pasojë e aksidentit ka tre persona të lënduar, teksa zjarri brenda tunelit është fikur.

Policia ndodhet në vendngjarje dhe po punon për zbardhjen e aksidentit dhe normalizimin e trafikut, i cili prej disa minutash është i rënduar.

Njoftimi i policisë

Në aksin rrugor “Elbasan-Tiranë”, në tunel, automjeti me drejtues shtetasin E. S., 76 vjeç, në lëvizje, ka goditur nga mbrapa kamionin me drejtues shtetasin D. L., 52 vjeç, dhe për pasojë automjeti me drejtues shtetasin E. S., ka marrë flakë dhe është djegur pjesërisht.

Nga përplasja, kanë shkuar në spitalin e Elbasanit për të kryer ekzaminime mjekësore drejtuesi i automjetit shtetasi E. S. dhe 2 pasagjerë që udhëtonin me të.

Grupi hetimor po punon për përcaktimin e rrethanave të aksidentit dhe dokumentimin me prova ligjore të rastit.