Një aksident i rëndë është regjistruar rreth orës 04:30 të mëngjesit të sotëm në rrugën nacionale Prishtinë-Ferizaj, ku si pasojë ka humbur jetën një person dhe një tjetër është plagosur.
Lajmi është konfirmuar nga zëdhënësi i policisë për rajonin e Prishtinës, Agron Borovci, i cili tha se policia e cila shkoi menjëherë në vendngjarje dhe ka nisur hetimet mbi shkaqet dhe rrethanat e aksidentit.
“Si pasojë e këtij vetaksidenti një person (femër) ka humbur jetën ndërsa një tjetër ka pësuar lëndime trupore dhe e njëjta është dërguar për trajtimin e nevojshëm mjekësor. Policia ka dalë në vendin e ngjarjes dhe ka nisur një hetim për zbardhjen e shkaqeve të këtij aksidenti”, -thuhet në njoftimin e policisë.
Të dhënat e para raportojnë se në makinë gjendeshin dy gra dhe aksidenti ka ndodhur si pasojë e humbjes së kontrollit dhe mjeti është përplasur me një ndërtesë, ku si pasojë njëra prej tyre ka ndërruar jetë rrugës për në spital.
