Numri i aksidenteve në vendin tonë është i lartë, teksa përgjatë vitit 2021 janë regjistruar 168 viktima.
Shefi i sigurisë rrugore në Policinë e Shtetit, Skënder Ismaili thotë se 85% e aksidenteve shkaktohen nga shkelja e rregullave të qarkullimit rrugor.
Sipas tij, shkaktarë shpeshherë janë edhe vetë këmbësorët, konkretisht në 15% të aksidenteve. Tashmë ka nisur edhe sistemi i gjobitjes së këmbësorëve, por një problem është dërgimi i gjobave në banesë, për shkak të sistemit jo të mirë të adresave dhe mosmbajtja me vete nga një pjesë qytetarëve të ID-së.
“85% e ngjarjeve rrugore dhe atyre me pasoja kanë ardhur si rezultat i mosrespektimit të rregullave, sinjalistikës, parakalimet e gabuara. Nëse këta do kishin zbatuar rregullat, këto ngjarje mund të ishin ndaluar”, tha Ismaili.
Numri i madh i gjobave të vendosura nga efektivët e policisë rrugore, sipas tij nuk janë dashakeqësi, por për të shmangur aksidentet.
“Policia ka përgjegjësitë e veta morale, 410 mijë shkelje përgjatë këtij viti të përdoruesit të rrugës, që nuk e kanë dhënë efektin e duhur, lë për të dëshiruar është mos zbatimi i rregullave. Ne nuk jemi në çdo rrugë, prezencë të policisë ka të shtuar, se gjithmonë sulmohet policia, qytetarët duhet të jenë të përgjegjshëm, ne jemi kritikuar se vëmë gjoba, por shkeljet janë të shumta,5600 veta të dehur në timon, 12 mijë parakalime të gabuara, 2300 raste që nuk respektojnë sinjalet rrugore”, u shpreh ndër të tjera përfaqësuesi i uniformave blu.
Discussion about this post