Drejtori i Përgjithshëm i Policisë së Shtetit, Gledis Nano, zhvilloi me drejtuesit e Policisë Rrugore në qendër dhe në qarqe, një mbledhje analizuese të rezultateve të tremujorit të parë të vitit 2022, si dhe për prioritetet e tremujorit të dytë të këtij viti. Nano, pasi u njoh më nga afër me rezultatet dhe problematikat vuri theksin te numri i lartë i shkeljeve të rregullave rrugore. Prandaj ai urdhëroi q ëtë hartohet një plan më efektiv dhe të vihet në zbatim sa më shpejt. Një taktikë që do të vihet në zbatim, sipas Nanos, është që policia do të qarkulloj me makinë pa logo që të mund të kapë shkelësit, të cilët në shumë raste kërkojnë të shpëtojnë sapo shohin patrullat.
“Nga ana juaj, unë do të kërkoj një reagim emergjent për ndryshimin e situatës së qarkullimit rrugor në vend dhe do të kërkoj që sot, hartimin e një plani masash këtu në qendër, nga Departamenti për Sigurinë Publike dhe deri ditën e nesërme, njohjen e të gjithë stafit tuaj, me detyrimet e këtij plani dhe në datën 14, fillimin e zbatimit të planit në të gjithë vendin. Do të fokusohemi në shkeljet e drejtuesve të mjeteve, nga të cilat vijnë pasojat fatale. Do të organizohet puna, duke kombinuar me patrulla civile, me mjete të pauniformuara dhe duke përdorur të gjitha mjetet logjistike, me qëllim evidentimin dhe ndëshkimin e atyre drejtuesve të automjeteve që nuk përdorin rripin e sigurimit për vete dhe pasagjerët, të atyre drejtuesve që përdorin aparatin celular gjatë drejtimit të mjetit, që kryejnë parakalime të gabuara, që qarkullojnë me shpejtësi mbi normat e lejuara dhe që kryejnë manovra të rrezikshme në rrugë”, u shpreh Nano.
Ndër të tjera, ai kërkoi që të ashpërsohen masat për të gjithë ata drejtues mjetesh që përdorin fenelina dhe sinjale zanore, në kundërshtim me Kodin Rrugor, që riveshin xhamat me qese plastmasi, që përdorin targa të huaja apo që u ka mbaruar afati i përdorimit, ata drejtues motomjetesh që nuk përdorin kaskën mbrojtëse, si dhe ata drejtues mjetesh që nuk u japin përparësi këmbësorëve apo parkojnë në trotuar a vende në të cilat nuk lejohet parkimi, cilëtdo qofshin këta, qytetarë apo punonjës të Policisë.
Discussion about this post