Dy persona janë vënë në pranga pas aksidentit që ndodhi të martën në Këlcyrë, ku humbën jetën shoferi i makinës tip “Benz” dhe shtatë refugjatë. Një i tretë është shpallur në kërkim.
Agustin Gjeta dhe Ramazan Dekovi, banues në Shkodër, janë arrestuar për akuzën e ndihmës për kalim të paligjshëm të kufirit.
Ndalimi i tyre është bërë në Shkodër për llogari të policisë së Gjirokastrës. Sipas burimeve, këta persona kanë bashkëpunuar me shoferin Edison Bregaj, vetëm 24 vjeç, që gjendej në timonin e makinës së shkatërruar.
Agustin Gjeta, referuar hetimeve, është edhe personi që ka marrë me qira nga një biznes i linjës në Shkodër, makinën tip “Benz” që u shkatërrua në aksident.
Policia ka shpallur në kërkim një 23-vjeçar me iniciale S.N., banues po në Shkodër, i cili dyshohet se kishte rolin e organizatorit në këtë veprimtarinë e paligjshme të transportit të refugjatëve.
Sipas policisë, emigrantët e paligjshëm, të moshave nga 28-32 vjeç, ishin nga Pakistani, ndërsa 3 prej tyre janë identifikuar.
Në një njoftim zyrtar, policia bëri me dije se “7 shtetasit nga Vendet e Treta që humbën jetën nga ky aksident po transportoheshin nga drejtuesi i automjetit, nga kufiri grek drejt kufirit të Shkodrës, kundrejt pagesës, me qëllim kalimin e paligjshëm të kufirit”.
Ngjarja e rëndë u regjistrua në orët e para të së martës. Sipas hetimeve paraprake, Bregaj tentoi të largohej me shpejtësi pasi pa një patrullë policie. Por në afërsi të fshatit Kuqar, dyshohet se për shkak të shpejtësisë së madhe me të cilën lëvizte, ai “fluturoi” rreth 500 metra dhe ra në anë të lumit Vjosa.
Lexo edhe:
Detajet – Si ndodhi aksidenti me 8 viktima në Këlcyrë
Aksidenti në Këlcyrë, reagon Avokati i Popullit: Kambanë alarmi
Discussion about this post