Aksidenti në Kalimash, dy viktima dhe 3 të plagosur. Detajet

Policia ka reaguar lidhur me aksidentin e rëndë që ndodhi pasditen e së mërkurën në tunelin e Kalimashit, ku dy persona humbën jetën dhe janë plagosur 3 të tjerë.

Sipas Policisë, në aksident u përfshinë një automjet tip Ford ku udhëtonin 3 persona, banues në Kosovë, një automjet tip Benz me drejtues një shtetas banues në Tropojë dhe një autobot që drejtohej po nga një shtetas që banon në Kosovë.

Njoftimi i Policisë:

Kukës/Informacion paraprak

Rreth orës 17:45, në tunelin e Kalimashit, janë përfshirë në një aksident rrugor automjetet tip “Benz” me drejtues shtetasin A. B., banues në Tropojë, automjeti tip “Ford”, ku udhëtonin shtetasit S. O., N. O., dhe I. L., banues në Kosovë, si dhe autoboti me drejtues shtetasin Sh. S., banues në Kosovë.
Nga aksidenti kanë humbur jetën dy shtetas, ndërsa 3 shtetasit e tjerët po marrin mjekim dhe ndodhen jashtë rrezikut për jetën.

Grupi hetimor po punon për përcaktimin e shkaqeve të aksidentit.