Aksidenti në Pogradec, arrestohet drejtuesi i mjetit dhe përgjegjësi i firmës së pastrimit (EMRAT)

Aksidenti i djeshëm në Pogradec, ku fadroma goditi rëndë pushuesin, i cili ndodhet në gjendje të rëndë në spitalin e Traumës në Tiranë, ka çuar në pranga drejtuesin e mjetit Denis Piperi 31 vjeç, si edhe përgjegjësin e firmës së pastrimit, Gentjan Dervishi 40 vjeç.

53-vjeçari Agron Keta u përplas ditën e djeshme nga një fadromë në liqenin e Pogradecit. Ai më pas është dërguar me helikopter drejt spitalit të Traumës në Tiranë. Gjendja e pushuesit nga Tirana ka qenë kritike dhe ka nevojë për ndihmë më të specializuar.

Sipas policisë, ngjarja ka ndodhur në vendin e quajtur “Plazhi” ndërsa mjeti që shkaktoi aksidentin drejtohej nga 31-vjeçari Denis Piperi. Mësohet se pushuesi ka qenë në gjumë kur është aksidentuar. Mjeti i rëndë shërbente për pastrimin e mbetjeve liqenore.

Njoftimi i Policisë:

Pogradec

Goditi me fadromë, gjatë punës për pastrimin e bregut të liqenit, një pushues, i cili si pasojë u dëmtua rëndë, vihet në pranga drejtuesi i këtij mjeti.

Në pranga dhe përgjegjësi i firmës së pastrimit, mbi dyshime për shkelje të rregullave të mbrojtjes në punë.

Në vijim të informacionit paraprak, të dhënë ditën e djeshme, për një shtetas të aksidentuar nga një fadromë, në plazhin e Pogradecit, ju informojmë se:

Specialistët për Hetimin e Krimeve të Komisariatit të Policisë Pogradec arrestuan në flagrancë shtetasin Denis Piperi, 31 vjeç (punonjës i një firme pastrimi), banues në Pogradec, pasi në lagjen nr. 1, Pogradec, në plazhin e liqenit, me një mjet teknologjik (fadromë), me të cilin ky shtetas po pastronte mbetjet në bregun e liqenit, ka goditur shtetasin A. K., 53 vjeç (pushues), banues në Tiranë, i cili u dëmtua rëndë dhe për këtë shkak, ndodhet në spital, në kujdesin e mjekëve.

Gjithashtu, nga hetimet për këtë rast, u vu në pranga shtetasi Gentjan Dervishi, 40 vjeç, banues në Pogradec, me detyrë përgjegjës i kësaj firme pastrimi, për veprën penale “Shkelja e rregullave të mbrojtjes në punë”, pasi dyshohet se nuk ka kontrolluar punonjësit e firmës dhe nuk i ka sqaruar ata, në lidhje me detyrat.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.