Ministri i Drejtësisë, Ulsi Manja ka reaguar pas aksidentit të rëndë që i mori jetën efektivit të burgjeve Luan Cenollari, i cili u godit nga një makinë teksa ndodhej në punë si taksist gjatë orëve të natës.
Ndërsa i shprehu ngushëllimet familjarëve, ministri bën me dije se e di situatën dhe do bëjë maksimumin që ajo të ndryshojë.
“Me hidhërim të thellë mësova për ndarjen nga jeta të Luan Cenollarit, punonjës i Forcave Operacionale pranë Drejtorisë së Burgjeve, në një aksident automobilistik. Prej së paku 16 vitesh në detyrë, Luani, 57 vjeç, la pas dy fëmijë, djalin 27 vjeç dhe vajzën 22 vjeç, si dhe bashkëshorten. Jam përkrah tyre në këtë dhimbje dhe do të bëjmë gjithçka për ta lehtësuar sadopak! Jam përkrah edhe kolegëve të tij! E di situatën, dhe po bëj përpjekjet maksimale që ajo të ndryshojë. Ngushëllimet më të sinqerta familjes Cenollari!”, shkruan Manja.
Ngjarja e rëndë ndodhi mëngjesin e sotëm në kryqëzimin “21 Dhjetori” në Tiranë, rreth orës 3:20 pas mesnatës. Emirjan Doko, 30-vjeç ka qenë duke qarkulluar nën efektin e alkoolit dhe ka hyrë me semafor të kuq në kryqëzim duke shkaktuar kështu përplasjen e rëndë që solli edhe vdekjen e menjëhershme të Luan Cenollarit dhe Ali Bejot 69 vjeç që udhëtonin me makinën tjetër.
Discussion about this post