Një i ri humbi jetën këtë të hënë teksa punonte një kantier ndërtimi në zonën e ish-Kinostudios në Tiranë, duke rritur numrin e viktimave në punë të ndodhura javët e fundit.
28-vjeçari Ardian Fejzullahi ka rënë nga kati i 7-të i pallatit në ndërtim, teksa dyshohet se ka qenë duke ngjitur disa kova me llaç në katet e sipërme të objektit. “Rreth orës 08:20, në rrugën ‘Aleksandër Mojsiu’, në një pallat në ndërtim e sipër, duke punuar ka rënë nga lartësia shtetasi A.F., 28 vjeç, i cili si pasojë e dëmtimeve të marra ka humbur jetën”, njoftoi zyrtarisht policia e Tiranës. Referuar dëshmive të kolegëve të të riut në vendngjarje, 28-vjeçari kishte vetëm 20 minuta që kishte marrë turnin.
Për këtë ngjarje është shoqëruar drejtuesi teknik i punimeve në kantierin ku po ndërton firma “ANDI Konstruksion” me pronar të vetëm Latif Mihan, i cili është edhe zëvendëskryetar i Shoqatës së Ndërtuesve.
5 aksidente me vdekje në punë brenda Majit
Ky është aksidenti i pestë me vdekje në punë brenda Majit. Më herët gjatë muajit, dy punonjës të tjerë kanë humbur jetën duke punuar në ndërtim, në Lezhë. Një 24-vjeçar humbi jetën teksa punonte në një gurore në Brataj të Selenicës, pasi një masiv guri u shkëput nga mali dhe e zuri poshtë. Viktima e katërt u shënua në një minierë në Martanesh, ku shembja e një masivi gurësh në galeri zuri poshtë dy minatorë, duke lënë të vdekur një prej tyre dhe plagosur tjetrin.
Më datë 9 majit 2024 në Lezhë, një punëtor 28-vjeçari gjeti vdekjen pasi ra nga kati i nëntë i pallatit teksa po montonte vinçin dhe u shkëput. Nga verikimet rezultoi se i riu Emiliano Frroku punonte në të zezë dhe dy katet e fundit të pallatit po ndërtoheshin pa leje. Në lidhje me ngjarjen policia shpalli në kërkim 3 persona dhe një tjetër u procedua penalisht në gjendje të lirë.
Dy ditë më vonë, konkretisht mesditën e 11 majit, një tjetër aksident në punë i mori jetën një 50-vjeçari Preng Gjoni, i cili u godit në kokë nga një dërrasë që u shkëput nga lartësia, teksa po punonte në një pallat në ndërtim në Kune. Për këtë rast, Gjykata ka caktoi masën “arrest shtëpie” për administratorin e kompanisë Martin Kovaçi dhe punëtorin Eduard Frroku.
Për ngjarjen e Vlorës, policia njoftoi arrestimin e drejtuesit teknik të gurores në fshatin Brataj, i akuzuar se nuk ka marrë masat për zbatimin e rregullave të mbrojtjes në punë. Edhe në këtë rast, pas aksidentit të ndodhur më 22 maj, u zbulua se gurorja nuk kishte leje për aktivitetin.
Ndërsa për aksidentin në Martanesh (21 Maj), ku humbi jetën 29-vjeçari Armand Peshku dhe u plagos 40-vjeçari Hajdar Bala, u arrestua brigadieri i subjektit minerar “për shkak të shkeljes së rregullave të mbrojtjes në punë”.
“Inspektorati i Punës në gjumë dimëror”
Pas ngjarjes së sotme, ka reaguar Konfederata e Sindikatave e Shqipërisë, që shprehet se “Inspektorati i Punës vijon të jetë në gjumë dimëror”.
“Këto shifra janë dramatike për një vend të vogël si Shqipëria, ndaj institucionet që mos qëndrojnë indiferente”, thuhet në njoftimin e Konfederatës.
Sipas të dhënave nga Inspektorati i Punës, nga viti 2018 deri në 2023, janë aksidentuar 1092 punëtorë, nga të cilët 194 kanë humbur jetën.
Discussion about this post