Detar ‘Tali’ Muça, një shqiptar 26-vjeçar që ka luajtur me ekipe amatore në Itali, ka ndërruar jetë në një aksident tragjik. Mediat italiane shkruajnë se i riu shqiptar banonte në Tortona të vendit fqinj.
Muça është ndarë nga jeta mëngjesin e kësaj të enjtje, pasi ishte aksidentuar të mërkurën mbrëma në autostradën A21 në Piacenza.
Muça ishte shofer në kompaninë Ecoprogram, në sektorin e logjistikës dhe drejtonte një furgon. Përplasja me një mjet të tonazhit të rëndë ka qenë fatale. I dërguar në spitalin e Parmës, ai ndërroi jetë një ditë më vonë.
I apasionuar pas futbollit, Muça luante në mesfushë dhe kishte veshur fanellat e shumë formacioneve në krahinën italiane, nga ekipet e të rinjve Derthona dhe San Giuliano Nuovo për të luajtur më pas për Garbagna dhe Audax Orione S. Bernardino.
Shumë klube e kujtuan atë në rrjetet sociale. Prej tre vitesh ai kishte veshur bluzën e Sale, me të cilën vitin e kaluar kishte arritur ngjitjen në Kategorinë e Parë. “Një lajm që na tronditi”, nënvizoi drejtori i Sale, Alberto Del Conte në Radio Gold. “Ngushëllime familjes. Jemi pa fjalë”, tha ai.
Discussion about this post