Familjarët e 45 viktimave dhe 7 të plagosurve nga aksidenti tragjik në Bullgari kanë kërkuar zbardhjen e të vërtetës, në mënyrë që të dinë se mbi kë rëndon përgjegjësia e humbjes së jetës të të afërmve të tyre.
“Përgjegjësinë e kanë institucionet shtetërore dhe duhet të zbardhet ky rast se si ka ndodhur. Ti kemi informacionet e sakta se për çka ka ndodh, kjo është diçka që s’po mundem jo vetëm unë ta besoj por askush prej familjarëve e shqiptarëve anembanë botës që jemi se brenda kësaj kohe të shkurtër me u djeg i gjithë autobusi me u shkrumbuar kjo është e papërshkrueshme, nuk e kap as logjika kurrsesi”- deklaroi Sevim Ahmeti, Familjar.
Ndërkohë qeveria ka vendosur që familjarëve të prekur nga kjo tragjedi të iu ofrojë ndihmë financiare dhe shërbime tjera, të cilat do të specifikohen në vijim nga organet kompetente, ku do të veprohet në bazë të vendimeve nga ligjvënësit.
Ndërsa Prokuroria shprehet se ka ndërmarrë masat e nevojshme për personat të përfshirë në mënyrë indirekte në këtë aksident tragjik.
Zëvendësministri i brendshëm Nazim Bushi tha se Ministria e Brendshme është në dispozicion të prokurorisë për të zbardhur ngjarjen.
“Nuk do të flas më tepër është në instanca të Prokurorisë Publike dhe presim të kemi rezultate sa më shpejtë. A do ta ndihmoni ju si Ministri? Patjetër, e kemi obligim! Deri më tani a ju kanë kërkuar dokumentacione? Jemi në rrjedha për gjithçka dhe jemi në dispozicion të Prokurorisë Publike”- pohoi Nazim Bushi, Zv/Ministër i Punëve të Brendshme
Ndërkohë deri në këto momente janë pushuar nga puna doganierët që nuk kanë evidentuar autobusët e “Besa Trans” në terminalet doganore. Në Sofje hetimi po vazhdon për shkaqet e tragjedisë., teksa 7 të mbijetuarit kanë dhënë dëshmitë e tyre dhe në bazë të ekspertizave teknike u konstatua që vdekja e të ndjerëve ka ardhur nga zjarri. Procedurë para hetimore po zhvillohet edhe nga Prokuroria e Shkupit për kompaninë “Besa Trans”, ndërkohë kompanisë i është marrë leja e punës.
Discussion about this post