Aksidenti tragjik në Greqi, humbin jetën 5 shqiptarë

Pesë shtetas shqiptarë kanë humbur jetën si pasojë e një aksidenti rrugor në Greqi.

Nga raportimet mësohet se aksidenti ka ndodhur në Edessa. Mësohet se automjeti ku po udhëtonin viktimat është përplasur me një kamion. Mediat greke shkruajnë se automjeti ku udhëtonin viktimat ka kaluar në korsinë e gabuar, atje ku ka ndodhur edhe përplasja fatale.

Aksidenti ka ndodhur në kilometrin e 87 të rrugës nacionale Follorinë-Selanik, kur në rrethana të paqarta të deritanishme një makinë është përplasur kokë më kokë me një kamion, për pasojë kanë humbur jetën të pesë personat që ndodheshin në makinë.

Është dashur ndërhyrja e shërbimit zjarrfikës për nxjerrjen e pasagjerëve nga makina, ndërsa drejtuesi i kamionit është dërguar në spitalin e Edessë i plagosur, pa rrezikuar shëndetin.

Nga informacionet e deritanishme, personat që udhëtonin në mjet mësohet se janë të huaj, pasi nuk ka përfunduar ende identifikimi i të dhënave të tyre, ndërsa makina në të cilën ndodheshin ishte me targa nga Shqipëria.

Hetimet paraprake për shkaqet e aksidentit po kryhen.