Aksidenti tragjik në Itali, mes viktimave edhe një mjek shqiptar/ Detajet

Një mjek shqiptar është mes viktimave që humbën jetën si pasojë e një aksidenti tragjik që ndodhi në Itali ditën e sotme (27 dhjetor).

Në aksident u përfshi një autobus që transportonte fëmijë dhe një ambulancë, në bordin e së cilës ishin një pacient, shoferi dhe dy personel mjekësor.
Si pasojë e përplasjes humbën jetën 4 personat që ndodheshin në ambulancë, e cila edhe u përfshi nga flakët.

Mediat italiane raportojnë se viktimat janë tre personat e ekipit të urgjencës dhe pacienti që po transportohej me ambulancë nga Fossombrone për në Urbino.
Sakaq, fëmijët e mitur në autobus, ishin një grup nga famullia Madonna della Speranza e Grottammare që po shkonin në ekskursion.

Fëmijët, që ishin nga mosha tre deri në tetë vjeç u plagosën lehtë, teksa shtatë prej tyre janë shtruar në spital.

Viktimat nga aksidenti janë Stefano Sabbatini (shofer), Cinzia Mariotti di Acqualagna (infermiere) dhe mjeku Sokol Hoxha, 40-vjeçar me kombësi shqiptare. Humbi jetën edhe pacienti që po transportohej me ambulancë: 85-vjeçari Alberto Serfilippi.