Aksion anti-drogë në disa qytete, forcat e policisë në kërkim të “bahçeve” me drogë

Një operacion blic është duke u zhvilluar në vend kundër kanabisit të mbjellë në zona të ndryshme.

Sipas informacioneve, forcat e policisë, po ushtrojnë kontrolle nëpër magazina dhe ambiente të mbyllura.

Mendohet se këto kontrolle zhvillohen në kuadër të denoncimeve dhe zbulimeve të policisë lidhur me “laboratorët e drogës” që janë përhapur në qytete të ndryshme.

Për organizimin e punës është ngarkuar zv.drejtori i Përgjithshëm Albert Dërvishaj, ndërsa strukturat nën monitorimin e të cilave do të zhvillohen kontrollet janë Drejtoria e Policisë Kriminale, e Rendit dhe Sigurisë Publike, e Emigracionit si dhe e Shërbimeve Mbështetëse.

Kontrollet do të zhvillohen në banesa, sera, depo, magazina, ish-reparte ushtarake, ish depot e rezervave shtetërore, shtëpi të braktisura, etj.

Nga operacionet e deritanishme, në qarqe të ndryshme të vendit, ambiente të tilla janë zbuluar që shfrytëzoheshin për kultivimin e bimëve narkotike dhe rritjen e fidanëve.

Periudha e parashikuar me nisjen e operacioneve korrespondon me kohën kur bëhet edhe përgatitja për mbjelljen e kanabisit.