Reperi Nichi, ka përfunduar në prangat e policisë pas një ndalimi rutinë në Prishtinë. Burime për Prive By Liberta Spahiu raportojnë se incidenti ka ndodhur gjatë mbrëmjes, kur Njësia Speciale ka ndaluar automjetin me të cilin ai po qarkullonte.
Gjatë kontrollit të detajuar, efektivët kanë gjetur një armë zjarri pa leje, çka ka bërë që reperi të shoqërohet menjëherë në stacion policor për verifikime dhe procedura të mëtejshme ligjore. Sipas informacioneve paraprake, arma është sekuestruar ndërsa hetimet kanë nisur në lidhje me posedimin e saj.
Ky zhvillim i papritur ndodh vetëm pak ditë pasi menaxheri i artistit, Bini Nebihu, raportoi një incident serioz me reperin Don Xhoni, vëllain e tij dhe disa persona të rrethit të tyre. Nebihu deklaroi se i ishte zënë pritë dhe se gjatë këtij konflikti të dyshuar, automjeti i tij ishte dëmtuar rëndë, teksa ai ndodhej në shoqërinë e familjes.
Ky episod bëri bujë në rrjetet sociale dhe ndezi debate mbi përshkallëzimin e konflikteve në skenën e repit shqiptar dhe arrestimi i sotëm i Nichit e shton edhe më shumë vëmendjen ndaj situatës që e rrethon artistin.
Policia pritet të japë detaje të tjera mbi rastin, ndërsa Nichi do t’i nënshtrohet procedurave ligjore që pasojnë në raste të tilla. Nuk dihet ende nëse ai do të lirohet në pritje të hetimeve apo do të përballet me masa të mëtejshme.
Discussion about this post