Aksion i Policisë së Kosovës, sekuestron armë e lëndë narkotike, arrestohen 18 persona

Policia e Kosovës ka njoftuar se në rajonin e Mitrovicës janë realizuar kontrolle në 19 lokacione të dyshuara për veprimtari të kundërligjshme.

Sipas policisë, gjatë aksionit janë arrestuar 18 persona, ku kanë konfiskuar disa armë e substanca të ndryshme narkotike.

Gjatë kontrolleve, 5 persona janë kontrolluar ku u janë gjetur dhe konfiskuar si provë materiale nga policia, një pushkë automatike, një pushkë gjysmë automatike, dy fishek, 3 karikatorë, pajisje për pastrimin e armëve si dhe sasi të ndryshme të substancave narkotike.

Ndërsa në Vushtrri, 8 persona janë kontrolluar ku u janë gjetur dhe konfiskuar si provë materiale sasi të ndryshme të substancave narkotike, dy mullinj për bluarje të substancës narkotike, letër për mbështjellës të substancave narkotike, dhe një karikator i zbrazet.

Në Skenderaj, 5 persona janë kontrolluar ku u janë gjetur dhe konfiskuar si provë materiale: një pushke ajrore, një sasi e municionit, një shufër metalike dhe një përzierje e duhanit me substanca të dyshuara narkotike.

Në njoftim thuhet se personat e dyshuar, tek të cilët janë gjetur dhe konfiskuar sendet e kundërligjshme, me urdhër të prokurorit janë intervistuar dhe ndaj tyre janë akuzuar për “mbajtje në pronësi, kontroll ose posedim të paautorizuar të armëve”.