Policia dhe Prokuroria e Fierit kanë goditur një skemë piramidale online, duke vënë në pranga gjashtë persona dhe duke shpallur në kërkim dy të tjerë. Ky operacion i koduar “XUEX” u shtri në disa qytete të vendit, si Fier, Tiranë, Dibër, Berat dhe Gramsh, pas një hetimi disa mujor.
Gjatë konferencës për shtyp, Policia njoftoi se operacioni kishte në shënjestër një grup individësh që mashtronin qytetarët duke u premtuar fitime të shpejta përmes investimeve në kriptomonedha si USDT dhe TRON. Skema funksiononte sipas modelit klasik piramidal, ku pjesëmarrësit rekrutonin persona të tjerë për të rritur fitimet e tyre, por në fund, vetëm nivelet e larta fitonin, ndërsa shumica humbnin kursimet e tyre.
Drejtoria e Hetimit të Krimit Kibernetik theksoi se përdorimi i kriptomonedhave nuk ishte rastësi, pasi ato ofrojnë vështirësi në gjurmim. Megjithatë, falë përdorimit të teknologjive të avancuara të analizës së zinxhirit të bllokut (blockchain) u bë i mundur identifikimi i autorëve dhe hallkave kryesore të skemës.
Të arrestuarit dhe provat e sekuestruara
Si rezultat i 83 kontrolleve të kryera, u arrestuan:
- Arbër Çela, 38 vjeç, nga Lushnja
- Emanuel Taullau, 21 vjeç, nga Lushnja
- Flavio Mukaj, 23 vjeç, nga Lushnja
- Marius Kodra, 28 vjeç, nga Tirana
- Brunilda Todi, 38 vjeçe, nga Divjaka
- Brunilda Ndini, 38 vjeçe, nga Divjaka
Gjithashtu, u shpallën në kërkim E. Sh. (35 vjeç) dhe A. Sh. (29 vjeçe). Të gjithë dyshohen për veprat penale “Skemat mashtruese piramidale” dhe “Mashtrim kompjuterik”.
Në cilësinë e provës materiale u sekuestruan:
- 50 aparate celularë
- 11 njësi kompjuterike
- 4.2 milionë lekë, 28 mijë euro, 1.750 dollarë dhe 340 franga
- 1 automjet
- U ngrinë edhe gjashtë llogari të kriptomonedhave.
Policia u bëri thirrje qytetarëve që të jenë të kujdesshëm ndaj premtimeve për fitime të shpejta dhe të denoncojnë çdo skemë të dyshuar mashtruese.
Discussion about this post