Një aksion blic është zhvilluar sot nga Policia e Shtetit në të gjithë vendin, për kapjen e personave të kërkuar, atyre që qarkullojnë me armë zjarri pa leje apo me lëndë narkotike.
Në këtë operacion të policisë janë arrestuan 3 persona në kërkim, po ashtu u kap edhe 1 person që qarkullonte me armë zjarri pistoletë, si dhe u vunë në pranga 2 shtetas që posedonin kokainë dhe kanabis.
Gjithashtu u sekuestruan një shumë e madhe në euro që një shtetas i transportonte nga Tirana për në Shkodër.
Konkretisht policia bën me dije se u kontrolluan 1872 automjete dhe 134 ambiente të ndryshme, pasi policia dispononte informacione operative me risk.
Janë shoqëruar për verifikim në ambientet e Komisariateve të Policisë në të gjithë vendin, 112 shtetas, ndër ta 32 persona me precedent penal.
Gjatë kontrolleve në Fier, u kap dhe u arrestua E. H., 28 vjeç, banues në Tiranë, pasi gjatë kontrollit të automjetit, në çantën e tij të krahut, Policia gjeti dhe sekuestroi një armë zjarri tip pistoletë dhe municion luftarak.
Në Shkodër, gjatë kontrollit të automjetit me drejtues B. S., 22 vjeç, Policia gjeti dhe sekuestroi shumën 31200 euro. Këtë shumë eurosh, drejtuesi i mjetit deklaroi se e kishte sjellë nga Tirana, për llogari të një shtetasi në Shkodër. Vijon puna për kapjen dhe shoqërimin e tij.
Në Vlorë, u kontrolluan banesa të personave në kërkim, njëri nga të cilët u kap në Vlorë, konkretisht shtetasi P. N., me masë sigurie “Arrest në burg” për veprën penale “Kultivimi i bimëve narkotike”.
Discussion about this post