Policia ka finalizuar gjatë natës dy operacione për goditjen e veprimtarisë kriminale në fushën e narkotikëve. Sipas policisë, janë arrestuar tre persona dhe sekuestruar 49 kilogramë e 600 gramë lëndë narkotike.
Në operacionin policor të koduar “Munella”, në fshatin Domgjon, Fanë, Mirditë, shërbimet e Policisë gjatë kontrollit të ushtruara në banesat e V.Ll. dhe P.N., kanë gjetur dhe sekuestruar në cilësinë e provës materiale 31 kilogramë e 600 gramë lëndë narkotike e dyshuar cannabis sativa.
Në përfundim të veprimeve, policia arrestoi V.Ll., 49 vjeç, lindur në Domgjon, Mirditë, banues në Zejmen, Lezhë dhe P.N. 43 vjeç, lindur në fshatin Xhuxhë, Mirditë, banues në Tale, Lezhë, për veprën penale “Prodhimi dhe shitja e narkotikëve, kryer në bashkëpunim.
Në kuadër të operacionit policor të koduar “Kaçinari ”, në fshatin Arrëz, Kaçinar , shërbimet e Policisë kanë ushtruar kontroll në banesën e B.Ç. dhe kanë gjetur dhe sekuestruar në cilësinë e provës materiale 18 kilogramë lëndë narkotike të dyshuar cannabis sativa.
Specialistët për Hetimin e Narkotikëve në DVP Lezhë, bënë arrestimin në flagrancë të B.Ç.,36 vjeç, banues në fshatin Arrëz, Mirditë, për veprën penale “Prodhimi dhe shitja e narkotikëve “, si dhe proceduan penalisht në gjendje të lirë për shkak të problemeve shëndetësore, babanë e tij P.Ç.
Discussion about this post