Një person i shpallur në kërkim ndërkombëtar është vënë në pranga nga policia e Gjirokastrës. 39-vjeçari i identifikuar si Klement Shehu, banues në Libohovë është shpallur në kërkim me urdhër të Gjykatës së Apelit në Romë, e cila e ka dënuar me 6 vite burg në vitin 2019. Ai do të vuajë dënimin për veprën penale “Organizatë kriminale me qëllim trafikimin e drogës ”, ndërsa i kanë mbetur dhe 4 vjet e 21 ditë burgim.
Ndërkohë Policia e Shtetit ka vijuar kontrollet për arrestimin e personave të shpallur në kërkim dhe evidentimin e shkeljeve të ligjit në fushën e lojërave të fatit dhe lëndëve narkotike. Si rezultat i kontrolleve të befasishme në Tiranë, Durrës, Lezhë, Shkodër, Vlorë dhe Gjirokastër u kapën dhe u arrestuan 19 persona.
Tre persona janë arrestuar në Nikël për veprat penale “Prodhimi dhe shitja e lëndëve narkotike”, “Mbajtja pa leje e armëve luftarake dhe municioneve” dhe “Moskallëzim krimi”, shtetasit Z. H., 22 vjeç, G. H., 23 vjeç dhe M. H., 31 vjeç, pasi gjatë kontrollit në një lokal, shërbimet e Policisë gjetën dhe sekuestruan një armë zjarri pistoletë, muncion luftarak dhe një sasi lënde narkotike kokainë e ndarë në doza gati për shitje. Në Vlorë u arrestua në flagrancë shtetasi G. M., 31 vjeç, pasi gjatë kontrollit fizik i janë gjetur një armë zjarri pistoletë, municion luftarak dhe një sasi lënde narkotike kokainë.
Në Tiranë janë evidentuar dy raste të përshtatjes së lokaleve në lotari të palejuara të lojërave të fatit. Në pranga janë vënë O. H., 36 vjeç, A. U., 21 vjeç, Në Kavajë dhe në Picar gjithashtu janë arrestuar dy shtetas për organizimin e lotarive të palejuara, me anë të aparatit celular, konkretisht M. P., 43 vjeç, si dhe M. D., 32 vjeç, banues në Kavajë.
Në pranga janë vënë dhe shtetasit A. D., E. S. dhe L. T., banues në Tiranë, pasi në Rrugën e Arbrit, në ambientet e lokalit në pronësi të shtetasit L. T., u gjet një sasi me lëndë të dyshuar narkotike kokainë.
Discussion about this post