Deputeti i Partisë Demokratike, Ervin Salianji, u shpreh mbrëmjen e sotme se opozita po proteston në Kuvend sepse i janë mohuar të drejtat e saj, duke përmendur këtu Komisionet Hetimore dhe përfaqësuesit në Komisionin për Reformën Zgjedhore.
Ai tha se është e turpshme që kemi një komision për reformën zgjedhore, i cili prej dy vitesh nuk zhvillon asnjë mbledhje, ndërsa mazhoranca e Edi Ramës, nuk pranon zëvendësimin e anëtarëve të opozitës.
I pyetur nëse aksioni opozitar në Kuvend është për të mbrojtur Sali Berishën nga hetimi i SPAK, Salianji tha në emisionin “Të Paekspozuarit” se gjithçka që bëhet ka lidhje me rolin e saj Kushtetues, dhe jo me përfitime apo me mbrojtjen e kujdo qoftë.
“Ngjarja me Sali Berishën ka ndodhur pasi opozita ka nisur aksionin opozitar.
Nuk ka lidhje as me ndonjë përfitim të opozitës, por rolit të saj kushtetues. Në çdo rast ne nuk kemi asnjë rast përtej parlamentit. Kërkojmë të drejtat që na garanton kushtetuata. Kemi kërkuar 3 komisione dhe kemi bërë kërkesë për rikompozimin e komisionit të Reformës Zgjedhore.
Publiku dhe ju e keni ndjekur se PS ka thënë se është shtyrë afati i komisionit të reformës zgjedhore. Ai ka dy vjet që funksionon dhe nuk bën asnjë punë. Ndërkohë që prioritet i opozitës është reforma zgjedhore, dhe ajo s’ka bërë asnjë mbledhje.
Në seancën për kalimin e rezolutës për Kosovën, kryetarja e kuvendit rrëzoi kërkesën për komisionet hetimore dhe nuk ndryshoi komisionin për reformën zgjedhore.
Ne po protestojmë për një të drejtë kushtetuese. Kë një akuzë për 20 milionë euro për çarterin e Ramës. Komisioni hetimor për portin e Durrësit që i është dhënë një kompanie që nuk dihet se kush është.
Kërkojmë një komision për rrjedhjen e të dhënave nga patronazhistët, targat, pagat, TIMS etj. Kemi kërkuar komision hetimor për 4 koncesionet në shëndetësi. Kemi komisionin për McGonigal. Gjykata Kushtetuese thotë se është e drejtë kushtetuese e opozitës”- u shpreh Salianji.
Discussion about this post