Organizatorët e flotiljes humanitare që synonte të dërgonte ndihma në Rripin e Gazës kanë ngritur akuza të rënda ndaj autoriteteve izraelite, duke pretenduar se aktivistët e arrestuar janë përballur me dhunë fizike dhe sulme seksuale, përfshirë raste përdhunimi.
Sipas organizatorëve të “Global Sumud Flotilla”, disa prej aktivistëve që janë liruar nga paraburgimi izraelit kanë përfunduar në spital me lëndime të ndryshme. Ata pretendojnë gjithashtu se janë raportuar të paktën 15 raste të sulmeve seksuale.
“Të paktën 15 raste sulmesh seksuale, përfshirë përdhunim. Të qëlluar me plumba gome nga afër. Dhjetëra njerëzve u janë thyer kockat”, thuhet në reagimin e publikuar nga flotilja në rrjetet sociale.
Ndërkohë, “Israel Prison Service” i ka hedhur poshtë të gjitha akuzat.
“Akuzat e ngritura janë të rreme dhe tërësisht pa bazë faktike”, deklaroi një zëdhënës i shërbimit të burgjeve për Reuters.
Ai shtoi se “të gjithë të burgosurit dhe të paraburgosurit mbahen në përputhje me ligjin, duke respektuar plotësisht të drejtat e tyre themelore dhe nën mbikëqyrjen e stafit profesional dhe të trajnuar të burgjeve”.
Të martën, forcat izraelite arrestuan 430 persona në bordin e 50 anijeve në ujërat ndërkombëtare, duke ndaluar flotiljen e përbërë nga vullnetarë që synonin të dërgonin ndihma humanitare në Rripin e Gazës.
Pretendimet për abuzime kanë shtuar presionin ndaj autoriteteve izraelite për të dhënë sqarime mbi trajtimin e aktivistëve të ndaluar, veçanërisht pas publikimit të një videoje ku një ministër izraelit shihet duke tallur disa prej të arrestuarve brenda një burgu.
Discussion about this post