Aktivisti Florjan Myftari ka folur për hapat e radhës të protestës, duke deklaruar se qytetarët e kanë bërë tashmë të qartë qëndrimin e tyre dhe se protesta duhet të kalojë në një fazë të re.
Sipas Myftarit, tashmë është momenti që protesta të marrë përgjegjësi dhe të propozojë ide konkrete për ndryshimin e situatës në vend.
Ai u shpreh se shqiptarët “kanë zërin e tyre”, ndërsa sipas tij, politikanët vazhdojnë të mos e dëgjojnë atë.
“Është momenti që protesta të marrë përgjegjësi e të propozojë ide që mund t’i zhvillojmë vetëm së bashku”, tha Myftari.
Duke iu referuar katër muajve të protestës, aktivisti theksoi se nuk është shfaqur një lider i vetëm, pasi, sipas tij, liderët janë vetë qytetarët.
“Nuk mund të ketë një lider pa votë”, deklaroi ai, duke shtuar se protestuesit kanë zgjedhur të qëndrojnë jashtë politikës, ndonëse ndryshimi që kërkojnë është politik.
Myftari u bëri thirrje qytetarëve të mos dëshpërohen dhe të vazhdojnë të jenë të angazhuar për atë që ai e cilësoi si “Shqipëria që duam”.
Ai kritikoi gjithashtu përfaqësimin aktual politik në Kuvend, duke deklaruar se qytetarët nuk duan më njerëz që, sipas tij, janë të papërgjegjshëm.
Në vijim, aktivisti kërkoi ndryshimin e disa prej amendimeve kushtetuese të vitit 2008, duke i lidhur ato me rikthimin e sovranitetit te qytetarët.
“Shqipëria duhet të korrigjojë gabimet e Ramës dhe Berishës në 2008, ndryshimet kushtetuese, që të marrim sovranitetin, bashkë”, u shpreh Myftari.
Ai e mbylli deklaratën me kërkesën për një zgjidhje që, sipas tij, duhet të jetë “reale dhe e vërtetë”.
Discussion about this post