Aktivisti Mirgen Qiraxhi i ka kërkuar qytetarëve që të mos dorëzohen dhe të vazhdojnë protestën. Ai tha se paketa rezistenciale nuk është e mjaftueshme, pro fal protestave qeveria ka filluar të lëviz, të paktën iu ndërpreu shpenzimet marramendëse ministrave për lëvizje. Sakaq, ai tha se qeveria do ta kuptojë me këto protesta se kaq nuk mjafton dhe nuk mund të tallet me protestuesit.
“Falë jush kemi parë si çmimi i naftës të bjerë me 600 lekë. Falë jush dhe qëndresës tuaj ju keni fituar një palo paketë për rezistencë. Falë jush institucionet kanë filluar disi të lëvizin. Falë jush shpenzimet e kësaj qeverie kanë filluar reduktohen, ministrat e kësaj qeverie që ndiznin makinën dy orë para që kur të zbrisnin nga shtëpia ta gjenin të ngrohtë. Ju ja pretë. Falë jush kanë pretenduar se do ndalin spekulimin. Falë jush ai e kuptoi se këto nuk mjaftojnë. Qytetarët kanë nevojë për dinjitet, të jetojnë të begatë brenda kufijve të tyre“, u shpreh ai
Qiraxhi nuk la pa komentuar edhe deklaratat e kryeministrit Rama, i cili i ka konsideruar protestat një turp kombëtar. Ai tha se turp duhet të ketë një kryeministër që po shkatërron vendin e tij, po cenon arsimin dhe ka sjellë një krizë ekonomike. “Askush nuk është turpëruar nga ju, askush nga bota perëndimore nuk është turpëruar nga ju, askush që ka dëshirë për demokraci nuk është turpëruar nga ju, ju keni turpëruar një kryeministër që ju mban të fundit në ekonomi, në arsim, në kujdes shëndetësor. Kjo është protesta e njerëzve të lirë, e pensionistëve, e prindërve dhe fëmijëve, protesta unike në 8 vite që nuk ka shkulur një lule, nuk ka bërë pis një trotuar, nuk ka prekur një polic, ky është tmerri i tij. Protesta jonë paqësore është dhunë ndaj tij, e keni mbyllur brenda dyerve të hekurit në mënyrë të pakuptimtë. Askush nuk duhet të ketë frikë, këta janë qytetarët e Shqipërisë, kjo është Shqipëria“, u shpreh aktivisti.
Discussion about this post