Aktivitet kriminal/ SPAK kërkon konfiskimin e pasurive të Florenc Çapjas, zbardhet lista

Prokuroria e Posaçme (SPAK) i ka kërkuar GJKKO-së konfiskimin e pasurive të sekuestruara në kuadër të procedimit pasuror nr.6 të vitit 2022.

Më konkretisht bëhet fjalë për pasuritë e Florenc Çapja, një prej personazheve më të njohur të krimit të organizuar në Elbasan dhe personave të lidhur me të si Fejzulla dhe Xhemile Çapja (prindërit e tij), si dhe Ferit dhe Bledar Muça, ky i fundit i vrarë në Belgjikë.

SPAK thotë se në përfundim të hetimit pasuror rezulton se pasuritë e sekuestruara janë të pajustifikuara nga burime të ligjshme dhe për pasojë prezumohet se janë rezultat i aktivitetit kriminal të subjektit Florenc Çapia.

Florenc Çapja alias Çopja është dënuar me burgim të përjetshëm për vrasjen e babë e bir, Gentian dhe Nezir Beqiri, ngjarja kjo e ndodhur më 15 gusht 2012 në qytetin e Elbasanit. Si porositës i kësaj vrasje të dyfishtë ndodhet në qeli dhe vuan dënimin me burgim të përjetshëm xhaxhai i tij, Ardian Çapja alias Çopja.

Ndërkohë, pasuritë Florenc Çapjas janë sekuestruar dhe kërkohet konfiskimi në kuadër të hetimit, ku ai akuzohet si porositës i vrasjes së Sokol Xanxhaktarit, e mbetur në tentativë, ngjarje e zbardhur nga dëshmitë e të penduarit të drejtësisë, Nuredin Dumani në kuadër të operacionit “Plumbi i Artë”.

Në lidhje me këtë ngjarje, mbi Florenc Çapjan alias Çopjan janë ngritur akuzat për veprat penale:“Sigurim i kushteve dhe i mjeteve materiale për të kryer vrasje”, kryer në bashkëpunimin e posaçëm të “Grupit të strukturuar kriminal”, “Kryerje e veprave penale nga grupi i strukturuar kriminal dhe organizata kriminale”.

Florenc Çapja alias Çopja ndodhet në arrati prej disa vitesh.

Pasuritë e sekuestruara për të cilat kërkohet konfiskimi janë:

• Pasuria e llojit arë, me sipërfaqe 500 m2, me adresë Udenisht, Pogradec, në pronësi të shtetasit Ferit Muça.
• Pasuria e llojit ndërtesë ekonomiko-sociale, një kat, me sipërfaqe trualli 36.2 m2 , sipërfaqe ndërtese, 25.73 m2 , me adresë Lagjia “Emin Matraxhiu”, Elbasan, në pronësi të shtetasit Fejzulla Ramazan Çapia (babai i shtetasit Florenc Çapia).
• Pasuria e llojit arë +truall +ndërtesë, me sipërfaqe totale 1756 m2, truall me sipërfaqe 450 m2, sipërfaqe ndërtese 214 m2, në pronësi të shtetasve Fejzulla Ramazan Çapia dhe Xhemile Bajram Çapia (babai dhe nëna e shtetasit Florenc Çapia).
• Pasuria e llojit godinë banimi, me sipërfaqe trualli 498.8 m2, sipërfaqe ndërtese 293.8 m2. Godine banimi 2 kate + 1 kat nëntokë, me adresë Lagjia “Emin Matraxhiu”, Elbasan në pronësi të shtetasit Fejzulla Ramazan Çapia (babai i shtetasit Florenc Çapia).
• Pasuria e llojit Truall + Ndërtesë, me sipërfaqe totale 360 m2, sipërfaqe ndërtese social- ekonomike, 1 kat 120 m2, me adresë Lagjia “Emin Matraxhiu”, Elbasan, në pronësi të Bledar Mefail Muça.
• Pasuria e llojit Arë, me sipërfaqe totale 720 m2, me adresë Lagjia “Emin Matraxhiu”, Elbasan, në pronësi të shtetasve Fejzulla Ramazan Çapia dhe Xhemile Bajram Çapia.
• Pasuria e llojit Arë, me sipërfaqe totale 764 m2, me adresë Lagjia “Emin Matraxhiu”, Elbasan, në pronësi të shtetasve Fejzulla Ramazan Çapia dhe Xhemile Bajram Çapia.
• Pasuria e llojit Arë, me sipërfaqe totale 1380 m2, me adresë Lagjia “Emin Matraxhiu”, Elbasan në pronësi të shtetasve Fejzulla Ramazan Çapia dhe Xhemile Bajram Çapia.
• Automjeti tip autoveturë, Marka Audi, Tipi 4E, Modeli A8, viti i prodhimit 2008.
• Subjekti “Fejzulla Çapia” (P.F) me NIPT L53322244G, me objekt aktiviteti “Lavazh Bar-Kafe”, me adresë lagjia “Emin Matraxhiu”, Elbasan.