Deputeti i Partisë Demokratike, Ferdinand Xhaferraj në një intervistë për mediat është shprehur se aktiviteti i kreut të PD ditën e sotme, shuajti zërat që thonin se Basha nuk bën dot aktivitete dhe nuk mbledh dot njerëz.
“Deri tani thonin se Basha nuk bën dot aktivitete dhe nuk mbledh dot njerëz, sot ai u pa mes qindra njerëzve. Unë nga Durrësi u nisa dhe ishin edhe 2 makina të rinj që u nisën për të marrë pjesë në këtë event dhe nuk ranë pre e propagandës që keni rënë edhe ju.
Elementi më pozitiv i aktivitetit të sotëm kishte të bënte me faktin që në një moment kur shumë të rinj filluan të bërtisnin Basha, Basha ky i fundit u bëri thirrje që të ndalonin dhe të mos thërrisnin emrin e tij. Basha kishte ardhur për të takuar dy familje të prekur nga tërmeti, dhe u tha sikur nuk mblidhte dot njerëz. Faktet janë këto që tek aktiviteti i sotëm ishin mbi 600 pjesëmarrës. Në Kuvendin e PD në qershor me anëtarësi ishin me mijëra votues të cilët dhanë votën për Bashën” – tha Xhaferraj.
Më tej Xhaferraj shprehu keqardhjen dhe trishtimin e tij sa i përket gjendjes aktuale në PD, por shtoi se duke filluar që prej datës 18 dhjetor ku do të mbahet Kuvendi i thirrur nga Basha, PD nuk do ketë më dy krerë partie.
“Në 8 vite qarkullonte debati se cili ishte kryetari i PD, Basha apo Berisha. Më pas kishte të bënte edhe qëndrimi i SHBA. PD është në një nga momentet më të vështira të saj për shkak të lëvizjes së shkaktuar nga lideri politik. Do ishte një çmenduri politike të mendosh se lideri historik të mos mbushë sallat. Do ishte shqetësim serioz për PD nëse njeriu që udhëhoqi PD-në të mos ishte në gjendje të organizonte aktivitete. Unë jam shumë i mërzitur që jemi ndarë mes kolegëve se nuk e kemi betejën me njëri-tjetrin. Një nga dëmet më të mëdha që ka krijuar foltorja është fakti që janë lënë në hije përballjet me qeverinë” – tha më tej Xhaferraj.
Discussion about this post