Aktivizohet një tjetër vatër zjarri në Berat, dyshohet e qëllimshme

Një ditë pasi forcat zjarrfikëse arritën të vinin në kontroll një vatër zjarri në Berat, një tjetër është aktivizuar mëngjesin e sotme në fshatin Mbreshtan.

Ditën e shtunë u dogjën 2 hektarë me shkurre e ferra dhe rreth 40 pemë me ullinj, ku u desh ndërhyrja e forcave zjarrfikëse për të vënë në kontroll flakët, dhe vetëm 24 orë më pas, një tjetër vatër u aktivizua në të njëjtën zonë.

Flakët fillimisht u shfaqën në zonën me shkurre e ferra dhe më pas përparuan me shpejtësi edhe drejt pyllit me pisha. I favorizuar nga era, zjarri është përhapur me shpejtësi, ndërsa zjarrfikësit po përpiqen të shuajnë flakët.

Burime nga vendngjarj bëjnë me dije se zjarri mund të jetë vendosur nga vetë banorët për të hapur kullota.