Aktori Liçaj para bashkisë: Partia e Ramës vetëm e shqiptarëve nuk u bë kurrë

Ka nisur përpara Bashkisë së Tiranës protesta e opozitës, për atë që ata quajnë korrupsion të qeverisjes lokale dhe qendrore.

Aktori Neritan Liçaj në fjalën e tij deklaroi se Partia Komuniste ka 80 vjet që bashkëpunon me armiqtë e kombit shqiptar, serbët dhe rusët.

Ai iu bëri thirrje policëve që të bëhen shqiptarë prej vërteti.

Liçaj akuzoi se qeveria po dërgon vendin drejt lindjes e jo drejt perëndimit, siç e meriton populli shqiptar.

“Siç vidhemi ne, vidhen edhe policët. Partia Komuniste ka mbi 80 vjet që bëhet me serbët, rusët, grekët. PD ka mëkate, por nuk është ulur ndonjëherë në prehrin e ndonjë serbi. Këta janë horra. Këta i kanë bërë atentate Berishës pa fund, këta kanë gjuajtur Azem Hajdarin në parlament. E djathta asnjëherë nuk ka vrarë. Shumë drejtorë tuaj janë sigurimsa. Unë dua liri, demokraci, votë të lirë.

Ne nuk djegim, ne jemi shqiptarë, e respektojmë shqiptarin dhe kur vihen kundër nesh. Policë, fitoni respektoni për veten tuaj, sepse këta na kanë dërguar drejt Lindjes, pasi ne jemi popull perëndimor e duhet të ruajmë kombin tonë. Shikoni familjen tuaj, që vuajnë, që nuk gjejnë dot një punë, sepse kanë zënë vendet patronazhistët. Çuna, bëhuni shqiptarë prej vërteti.

Dhe kur flini gjumë, ato pak orë që flini,  pasi ju mbajnë në punë si kafshë,  ju vjedhin dhe del pastaj shqiptari kundër shqiptarit te kjo parti komuniste, kineze, ruse e Sorosit, po veç e shqiptarëve nuk u bë kurrë kjo parti”, u shpreh ndër të tjera ai.