Katër muaj pas vdekjes, aktorit të mirënjohur i teatrit dhe kinemasë shqiptare, Mirush Kabashi iu akordua titulli “Qytetar Nderi” i Durrësit.
Edhe pse për artisin ky është një vlerësim i vonuar, e bija e Kabashit shprehet se babai i saj vlerësimin më të madh e ka marrë nga publiku durrsak. Ndërsa aktorët të pranishëm në këtë ceremoni u shprehën se personalitet e skenës duhet të vlerësohen sa të jenë gjallë, dhe jo kur largohen nga jeta
“Është i vonuar, do doja ta merrte kur ishte gjallë! Mua më është dhënë që është lënë që ai ta merrte titullin në përvjetorin e lindjes, por nuk ishte e shkruar”, u shpreh vajza e aktorit, Mendi Kabashi, e cila mes emocionesh veçoi lidhjen e të atit me Durrësin. “Vlerësimi më i madh për të ishte publiku durrsak, më shumë se çdo titull” u shpreh ajo, duke zbuluar se dhe nipi mban emrin e gjyshit, Mirush.
Për aktoren Aishe Stari këta personalitete të skenës duhet t’i nderojmë sa janë gjallë, që titujt të mos kthehen në relike.
Ceremonia u organizua nga Bashkia e Durrësit në sallën e teatrit “Aleksandër Moisiu”, ku morën pjesë njerëz të artit e skenës në Durrës. Regjisorja Driada Dervishi kishte përgatitur një dokumentar pjesë e të cilit ishte edhe një intervistë e fundit e Mirush Kabashit, e patransmetuar më parë.
Mirush Kabashi u nda nga jeta më 5 dhjetor të 2023 në moshën 75-vjeçare, duke lënë pas një karrierë të gjatë, me një kontribut të çmuar, ku numërohen rreth 100 role në teatër dhe filma. I vlerësuar me shumë tituj brenda dhe jashtë vendit, midis të cilëve “Nderi i Kombit”, “Artist i Merituar” dhe “Mjeshtër i Madh i Punës”.
Discussion about this post