Prokurorët federalë të Nju Jorku thanë të martën, se një bastvënës i Queens-it, i cili dikur luajti në filmin e quajtur ‘Gangsterët shqiptarë’ u arrestua së bashku me dy mafiozë të njohur të familjes kriminale ‘Genoveze’, të cilët dyshohet se i kishte angazhuar për të mbledhur një borxh.
Treshja, duke përfshirë një kapo të dyshuar 84-vjeçar të familjes ‘Genovese’, u akuzuan në gjykatën federale të Bruklinit të martën për skemën e zhvatjes kundër një pronari restoranti italian, sipas një aktakuze të ngritur ndaj tyre, tha një burim nga policia federale.
Të dyshuarit – ylli i filmit Luan Bexheti, 49 vjeç, ushtari i njohur Joseph Celso, gjithashtu 49 vjeç, dhe 84-vjeçari Anthony ‘Rom’ Romanello, do të përballen me dy akuza federale për zhvatje. Celso përballet me një akuzë të tretë për pengim të drejtësisë, sipas aktakuzës.
Rasti ka nisur pas një borxhi për lojërat e fatit që një pronar restoranti i kishte grumbulluar Bexhetit në vitin 2017, kur aktori, i cili është shfaqur në më shumë se 40 filma, ishte duke u prezantuar si një bastvënës, tha një burim nga policia federale.
Bexheti me origjinë shqiptare, një bashkëpunëtor i familjes ‘Genoveze’, dyshohet se angazhoi Celso dhe Romanello për të mbledhur borxhin.
Romanello-i cili u lirua nga gjykata federale e Bruklinit një dekadë më parë për akuzat për zhvatje-dyshohet se e goditi pronarin e restorantit në fytyrë për ta bindur atë të paguante. Mafiozi tjetër i akuzuar, Celso, ishte i implikuar në vitin 1991, në vrasjen e Manuel Mayi, një student 19-vjeçar Dominikan i Kolegjit Queens.
Celso ishte i vetmi person i akuzuar për vrasjen, por u lirua në gjyq në 1993 pasi dëshmitari kryesor i çështjes u largua nga vendi, raportoi në atë kohë ‘The Post’.
Të tre të dyshuarit u deklaruan të pafajshëm dhe u liruan me garanci në gjyqet e tyre në gjykatën federale të Bruklinit të martën. Asnjë nga të pandehurit dhe as 8 të afërmit dhe miqtë me ta, nuk komentuan teksa largoheshin.
Një gjykatës vendosi garancinë e Celso në 1 milion dollarë, sepse ai akuzohet për pengim të drejtësisë, si dhe zhvatje. Avokatja e tij, Anjelica Cappellino, nuk pranoi të komentojë pas seancës./Boldnews
Discussion about this post