Prokuroria e Beratit ka përfunduar hetimet dhe ka dërguar për gjykim tre shtetas, të akuzuar për një rast të dyshuar të shfrytëzimit të prostitucionit.
Sipas organit të akuzës, dy prej tyre, me iniciale R.L. dhe E.V., akuzohen për veprën penale “Shfrytëzimi i prostitucionit”, kryer në bashkëpunim dhe në mënyrë të përsëritur.
Ndërsa shtetasi K.D. akuzohet për “Moskallëzim të krimit”.
Hetimet kanë zbuluar se dy të pandehurit kanë organizuar dhe mundësuar shfrytëzimin për prostitucion të një shtetaseje me iniciale Y.Sh.
Sipas dosjes hetimore, bashkëjetuesi i saj, R.L., ka qenë në dijeni të aktivitetit dhe ka përfituar financiarisht prej tij.
Ai dyshohet se ka përcaktuar klientët, vendin e takimeve dhe çmimet për shërbimet seksuale.
Gjithashtu, në disa raste ka ndihmuar edhe në gjetjen e klientëve.
Nga ana tjetër, E.V. akuzohet se ka luajtur rol ndihmës duke siguruar klientë dhe ambiente për aktivitetin.
Sipas hetimeve, shtetasja Y.Sh. ishte punësuar si balerinë në një lokal nate, por puna e saj dyshohet se është përdorur si mbulim.
Prokuroria thekson se aktiviteti është realizuar në bashkëpunim dhe me qëllim përfitimi financiar.
Në deklarimet e saj, viktima ka pohuar se ushtronte prostitucion dhe se paratë i merrte bashkëjetuesi i saj.
Ndërkohë, R.L. ka pranuar se e ka shtyrë atë drejt kësaj veprimtarie për shkak të vështirësive ekonomike.
Organi i akuzës thotë se provat e mbledhura e mbështesin akuzën për shfrytëzim të përsëritur.
Çështja tashmë do të shqyrtohet nga gjykata, e cila pritet të vlerësojë përgjegjësinë penale të të pandehurve.
Discussion about this post