Deputeti i Partisë Socialiste, Pandeli Majko i ka dërguar një letër Shërbimit Informativ të Shtetit, pas akuzave të bëra nga kreu i demokratëve Sali Berisha se ai është nën përgjimin e këtij institucioni.
Gjatë një konferencë me gazetarët, Berisha deklaroi se ekziston një përgjim i SHISH, ku Majko ndodhej së bashku me ish-kreun e Policisë së Kukësit, Alban Çelën dhe drejtorin e OSHEE të Kukësit, ku flasin për një tender 800 mijë euro dhe paratë do t’i shpërndanin në Has, Kukës dhe Durrës.
Teksa kërkon informacion për këtë çështje, Majko shkruan se përgjigja prej SHISH duhet të kthehet brenda 15 ditësh në të kundërt do të verë në dijeni dhe kryeministrin.
Të hënën, Sali Berisha akuzoi Pandeli Majkon për krime zgjedhore, pak pasi Edi Rama e largoi nga drejtimi politik i qarkut Kukës.
Akuza duket se i ka “gërvishtur” sedrën politike deputetit socialist, i cili një ditë më parë ka trokitur në zyrën e Elisa Spiropalit duke i kërkuar ndihmë kryeparlamentares, me synim që të “pastrojë” figurën e tij para se të shkojë përpara qytetarëve të Tiranës për të kërkuar votën në 11 maji.
Për të treguar që është i pastër, Pandeli Majko është i gatshëm të zhvishet nga imunitetit, pavarësisht se me ligjet në fuqi SPAK mund ta hetojë edhe pa këtë vendim të tij
Shkresa drejtuar SHISH
Të nderuar
Në referencë të akuzave publike të deputetit z. Sali Berisha, në konferencën e tij për shtyp të datës 06.01.2025, ndërmjet të tjerash ai pretendonte se në bazë të një informacioni të SHISH, Unë Pandeli Majko jam vënë në përgjim nga institucioni Juaj.
Me cilesinë e deputetit të Kuvendit të Shqiperisë si dhe në bazë të Ligjit nr.8550, datë 18.11.1999 “Për Statusin e Deputetit” e konkretisht të nenit 8 në të cilën thuhet se:
1. Deputeti ka të drejtë të kërkojë shpjegime për çdo çështje që ka të bëjë me përmbushjen e detyrës së tij, nga ministrat ose nga drejtuesit e institucioneve të tjera qendrore, si dhe nga drejtuesit e çdo institucioni tjetër në administratën publike ose të qeverisjes vendore
2. Drejtuesit e institucioneve të përmendura në pikën 1 të këtij neni janë të detyruar t’i përgjigjen deputetit brenda 15 ditëve nga data e paraqitjes së kërkesës.
3. Në rast shkeljeje të pikës 2 të këtij neni, njoftohet Kryeministri për të nxjerrë përgjegjësitë përkatëse. Në rastet e enteve apo institucioneve të tjera qendrore, njoftohet organi prej të cilit ato janë zgjedhur.” lutem më vini në dispozicion, konfirmimin Tuaj nëse ekzsiton një përgjim i tillë dhe nëse po, vënien në dispozicion të saj dhe të cdo informacioni tjetër i cili ka lidhje me emrin Tim.
Bashkelidhur, Fotokopje e deklaratës së deputetit Sali Berisha.
DEPUTETI Pandeli MAJKO
Discussion about this post