Anëtari i KAS Ledio Braho foli nga pallati i sportit Farie Hoti në Tiranë ku po kryhet procesi i rinumërimit të votave të 11 majit. Braho u pyet nga gazetarët për kërkesën e Erion Braçes, i cili në rrjete sociale publikoi një fletë votimi me simbolin e Fallusit në kutinë e PS, e cila u shpall e pavlefshme.
Braçe kërkoi që vota të shpallet e vlefshme. Braho thotë se PS duhet të bëjë një kërkesë që çdo votë me organin mashkullor gjenital të shpallet e vlefshme dhe KAS do dalë me një vendim.
“PS siç bëri dhe disa ditë më parë, mund t’i drejtohej KAS dhe të kërkohet që çdo votë me organ mashkullor gjenital të shpallet e vlefshme dhe ne do shprehemi me vendim siç u shprehëm në rastin e parë.”
Më tej, ai hodhi poshtë akuzat e opozitës për trafikim votash.
“Duhet të kemi parasysh se kur nisi ky proces nisi me ankim për trafikim votash. Duket qartë që nuk kemi arritur në shifra të tilla. Jemi në shifra të ulëta. Bëhet fjalë sot vetëm për bishta kryqesh. Është kryqi brenda apo jashtë kutisë. Ka interpretime votash individuale dhe jo trafikime votash masive. Tani nuk bëhet pis procesi i numërimit. Tani po tentohet me mënyra të tjera të bëhet pis procesi i rinumërimit. E kam cituar dhe herë tjetër, kemi vënë re se momenti i hedhjes në sistem, ngatërrohet një rresht me një rresh tjetër dhe bëhet një invers. Kjo për mua në rastin më të mirë është gabim njerëzor. Por duhet parë rast pas rasti.”
Discussion about this post