Pas akuzave të Presidencës ku akuzon Kuvendin që ka falsifikuar dokumentet, ky i fundit ka reaguar me anë të një deklarate. Në reagimin e tij thuhet se në respekt të pavarësisë së institucioneve dhe duke qenë se Kushtetuesja është tërhequr për një vendim, Kuvendi respekton heshtjen duke mos komentuar rastin. Kuvendi gjithashtu thotë se pretendimet e kreut të shtetit për manipulim dhe falsifikim nuk qëndrojnë.
“Në respekt të pavarësisë së institucioneve kushtetuese, duke qenë se Gjykata Kushtetuese është tërhequr për të marrë vendim, Kuvendi respekton heshtjen dhe nuk bën komente për rastin në fjalë. Për sa i takon pretendimeve të Presidentit të Republikës për manipulim ose për falsifikim, me përgjegjësi të plotë sqarojmë se këto pretendimet nuk qëndrojnë. Kuvendi i Shqipërisë, në datën 4 shkurt 2022, ka depozituar pranë Gjykatës Kushtetuese dokumentacionin zyrtar ligjor që lidhet me çështjen në shqyrtim” – thuhet në reagimin e Kuvendit.
Kujtojmë se ditën e sotme, në faqen zyrtare të Presidencës, u publikua kallëzimi penal ku Kuvendi akuzohet për falsifikim dokumentesh. Meta deklaroi sot se kallëzimi është depozituar në SPAK, Prokurorinë e Tiranës dhe për dijeni Prokurorit të Përgjithshëm./Gijotina.com/
Discussion about this post