Në Dhomat e Specializuara të Kosovës në Hagë sot pritet të fillojë paraqitja e çështjes së mbrojtjes ndaj Hysni Gucatit dhe Nasim Haradinajt. Sipas njoftimit të publikuar në faqen zyrtare të DhSK sot do të zhvillohet një seancë përgatitore për mbrojtjen e ish-krerëve të UÇK-së.
“Në përfundim të konferencës përgatitore të mbrojtjes në rastin Gucati dhe Haradinaj sot, trupi gjykues nxori një sërë urdhrash duke vendosur, ndër të tjera, se çështja e mbrojtjes do të fillojë nesër (3 dhjetor) me fjalën hyrëse të mbrojtjes së Gucatit”, thuhet në njoftim.
Mbrojtja e Haradinajt do të fillojë pas përfundimit të rastit të mbrojtjes së Gucatit. Paneli ka caktuar si date për mbylljen e seancave të rasteve të mbrojtjes 17 janar 2022. Gjykimi ndaj Gucatit dhe Haradinajt ka filluar në muajin tetor të këtij viti, ndërsa Zyra e Prokurorit të Specializuar e ka mbyllur çështjen e saj në nëntor.
Ish-krerët e Organizatës së Veteranëve të Luftës së UÇK-së, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
Discussion about this post