Kryeministri Edi Rama i është përgjigjur akuzave të deputetit Tritan Shehu se “Open Balkan” është një nismë e iniciuar nga presidenti serb për copëtimin e Kosovës, dhe që bie ndesh me “Procesin e Berlinit”.
Nga Kuvendi, Rama tha se janë ftuar të gjitha shtetet të bëhen pjesë pasi është një nismë me interes kombëtar.
“Është një hapësirë ku unë synoj që të zbatohen 4 liritë e BE-së, krahasimi që i bëni me Jugosllavinë është një lojë fjalësh e panevojshme, për mua kjo nismë është një interes kombëtar. Dua t’ju shtoj dhe diçka tjetër, po ju them këtë që se janë disa pyetje që lidhen me Kinën, jo Kina jo Rusia, jo shejtani. Unë di që Ballkani i Hapur është një njësi zbatimi e procesit të Berlinit, ne i kemi ftuar të gjitha shtetet që të bëhen pjesë, Kosova humbet duke munguar në atë tryezë. Unë di që historia tregon se ndërtimi i marrëdhënieve ekonomike është përdorur në histori si një katalizator për të zgjidhur çështje politike“, tha Rama.
Rama, gjithashtu njoftoi firmosjen e disa marrëveshjeve mes Serbisë, Malit të Zi dhe Shqipërisë në fund të këtij viti.
“Marrëveshjet do të firmosen pak javë më vonë në Tiranë dhe do bëjë që lehtësia që do krijohet për kompanitë që shkon rreth 500 kompani shqiptare të jetë eksponenciale me vështirësitë që kanë sot. Pyetni këto subjekte kombëtare. 57 prej tyre janë fruta perime. Kjo është nismë që nga viti 2015 në Samitin në Paris, ku unë me Vucic, kemi ngritur rrezikun e procesit të Berlinit që rrezikohej të mbetej në letër, dhe ashtu ndodhi”, u shpreh Rama.
Kryeministri shtoi se Ballkani i Hapur ishte një proces i përshtatur me atë të Berlinit dhe se shërbente për 4 liri themelore në rajon duke u ardhur në shërbim të gjithë importuesve dhe eksportuesve shqiptarë.
Discussion about this post