Gjykata e Apelit të Posaçëm ka miratuar masën e arrestit me burg ndaj Bledar Lilos, i akuzuar nga SPAK për “pastrim parash”, në kuadër të grupit kriminal.
Ish badigardi i Rezart Taçit kërkoi masë më të butë sigurie. Nëpërmjet mbrojtjes, Lilo ka pretenduar se nuk ka lidhje me akuzat, pasi është vetëm shofer.
Më 28 tetor SPAK mbylli hetimet për këtë çështje, ku ndaj tre të pandehurve ngrit akuzat e “Pastrimit të produkteve të veprës penale ose veprimtarisë kriminale”, “Grupi i strukturuar kriminal”, “Kryerja e veprave nga grupi i strukturuar kriminal”.
SPAK ka arritur në përfundimin se Taçi, Artur Balla dhe Bledar Lilo, në bashkëpunim me italianët Francesco Zummo, Fabio Petruzzella, Daniele Cestagalli kanë organizuar një skemë për pastrimin e parave në disa vende të botës, përfshirë këtu edhe Shqipërinë.
18.4 mln euro të mafies italiane “Cosa Nostra” u bllokuan në një bankë të nivelit të dytë në Shqipëri në nëntor 2021.
Ka qenë banka e nivelit të dytë e cila ka sinjalizuar prokurorinë për shumën e madhe të parave të cilat do të kalonin nëpërmjet një kompanie që ishte hapur nga biznesmeni i hidrokarbureve në vendin tonë, me destinacion final Singaporin.
Sipas institucionit të akuzës, këto veprime janë realizuar vetëm pjesërisht dhe nuk është arritur që paratë të transferohen në një tjetër bankë jashtë vendit. SPAK thekson se janë mbledhur prova se Taçi dhe dy personat e tjerë në këtë rast do të përfitonin një përqindje të caktuar nëse realizohej transferimi i parave jashtë vendit duke bërë në këtë mënyre pastrimin e tyre.
Rezart Taçi në atë kohë pati reaguar dhe mohoi akuzën e Prokurorisë së Posaçme. Biznesmeni i hidrokarbureve është i shpallur në kërkim ndërkombëtar me urdhër të SPAK.
Discussion about this post